Саха сиригэр дроннартан харыстыыр Мобильнай бөлөхтөргө сулууспаҕа ыҥыраллар

Саха сиригэр, дойду атын эрэгийиэннэригэр курдук, олох-дьаһах суолталаах эбийиэктэрин дроннартан (БПЛА) харыстыыр сыаллаах Мобильнай бөлөхтөрү тэрийиигэ саппааска баар дьону (резервистэри) сулууспаҕа ыҥыраллар.

www.sakha.gov.ru саайт иһитиннэрэринэн, бырайыак сүрүн уратыта — резервистэр анал байыаннай дьайыы зонатыгар ыытыллыбаттар. Кинилэр Саха сирин иһигэр эбийиэктэри харыстыыр эбээһинэстээхтэр.

Социальнай мэктиэлэр уонна бырааптар

Мобилизационнай резервэҕэ киирбит дьоҥҥо судаарыстыба толору социальнай мэктиэни биэрэр:

Үөрэнэр-эрчиллэр кэмҥэ киһи үлэлиир миэстэтэ уонна орто хамнаһа оннунан хаалар.
Судаарыстыба таҥаһынан-сабынан (обмундирование), олоххо уонна доруобуйаҕа страховканан хааччыйар, үөрэнэр сиргэ тиийэр айан ороскуотун уйунар.
Сайабылыанньа суруйбут дьоҥҥо эрчиллэр кэмнэригэр байыаннай сулууспалаахтар бырааптара, эбээһинэстэрэ уонна чэпчэтиилэрэ барыта тарҕанар.

Хамнас уонна төлөбүр кээмэйэ

Резервистэргэ төлөбүр икки көрүҥҥэ арахсар:

Ый аайы бэриллэр харчы:

Офицерга — 5 244 — 6 792 солк.
Сержаҥҥа — 3 353 — 4 127 солк.
Саллаакка — 2 580 — 3 525 солк.

Үөрэнэр-эрчиллэр кэмҥэ (анал хомуур) төлөнөр харчы:

Офицерга — 43 701 – 56 599 солк.
Сержаҥҥа — 27 944 – 34 391 солк.
Саллаакка — 21 496 – 29 376 солк.

Резервист диэн кимий?

53-с №-дээх Федеральнай сокуоҥҥа олоҕуран, резервист диэн — саппааска баар уонна мобилизационнай резервэҕэ сылдьарга бэйэтин баҕатынан хантараак түһэрсибит РФ гражданина. Мобильнай бөлөхтөрү тэрийии — дойду үрдүнэн куттал суох буолуутун хааччыйар уопсай быраактыка буолар.

Хайдах резервист буолуохха сөбүй?

Баҕалаах дьон олорор сирдэринэн байыаннай комиссариакка тиийэн сиһилии билсиэхтэрин сөп. Хардыылара олус судургу:

Чугастааҕы военкомакка тиийэн сайабылыанньа суруйаҕын;
Мэдиссиинэ хамыыһыйатын ааһаҕын;
Мобилизационнай резервэҕэ сылдьар туһунан хантараакка илии баттыыгын;
Дроннары (БПЛА) утары үлэлииргэ анал үөрэтэр кииҥҥэ баран эрчиллэҕин;
Үөрэҕи бүтэрэн баран, көннөрү гражданскай олоххор эргиллэҕин.