Саха сиригэр ойуур баһаарын бохсууга атын эрэгийиэннэртэн көмөлөһөллөр

Саха сиригэр ойуур баһаарын умуруорууга 1600 киһи үлэлиир, ол иһигэр 700-чэкэ киһи атын эрэгийиэннэртэн кэллилэр. Бу туһунан Ил Дархан Айсен Николаев бэҕэһээ, от ыйын 5 күнүгэр, «Россия 24» телеханаал эпиирин кэмигэр кэпсээтэ.

Айсен Николаев 50-тан тахса ойуур баһаарыны бохсууга көдьүүстээх үлэ-хамнас ыытылларын бэлиэтээтэ. Атын баһаардар хонтуруолга ылылыннылар. «60-тан тахса ойуур баһаара уустук суоллаах-иистээх сирдэринэн бааллар. Манна хайалаах, суола-ииһэ суох сир буолан, уоту умуоруоруу кыаллыбат. Билигин барыта 52 ойуур баһаарын  умуруораллар. Маны сэргэ, Иркутскай уобалаһын, Забайкальскай кыраай, Амур уобалаһын кытта кыраныысса таһыгар уустук быһыы-майгы бэлиэтэнэр. Бу сирдэринэн куйаас күн-дьыл турбутунан, күн ахсын саҥа уот күөдьүйүүтүгэр тиэрдэр», — диэн кини быһаарда.

От ыйын 5 күнүнээҕи туругунан Саха сиригэр 298 тыһыынча га иэннээх сиргэ 113 ойуур баһаара турбута биллэр. Баһаары умуруорууга 1605 киһи үлэлиир уонна 77 тиэхиньикэ тардылынна.  Авиапатрульга 20 салгын суудуната, оттон баһаары умуруорууга  Ми-8 уонна «Авиалесоохрана» бөртөлүөттэрэ туһанылыннылар.

Саха сиригэр эрэгийиэннээҕи уонна федеральнай таһымнаах ыксаллаах быһыы-майгы эрэсиимнэрэ үлэлииллэр.