Саха сирин маҕаһыыннарыгар пааспар оннугар — смартфон

Саха сирин маҕаһыыннарыгар судаарыстыбаннай сыыппара сервистэрин, ол иһигэр «MAX» национальнай мессенджер ханаалларын киллэрии үлэтэ эрчимнээхтик салҕанар. Бу туһунан sakha.gov.ru портал иһитиннэрэр.

Билигин өрөспүүбүлүкэ урбаанньыттарыгар атыылаһааччы сааһын уонна чэпчэтиилээх статуһун (льготатын) «Цифровой ID» нөҥүө хайдах бигэргэтэри, каасса аппараатын API MAX ситимигэр холбууру уонна «Госуслуги» сыһыарыыга баар «Госкан» нөҥүө судургутук бэрэбиэркэлиири быһаараллар.

Саҥа ирдэбил: 18+ табаарга — QR-код

Санатан эттэххэ, бу дьыл балаҕан ыйын 1 күнүттэн 18 саастарын туолбуттарга эрэ көҥүллэнэр табаары атыылыырга саҥа ирдэбил киирбитэ. Ол курдук, испиирдээх утахтары, энергетиктэри, табаҕы, никотиннаах табаардары, кальяннары, лотерея билиэттэрин атыылаһарга, ону тэҥэ тэрээһиннэргэ сылдьарга атыылаһааччы сааһын национальнай мессенджер нөҥүө хайаан да бэрэбиэркэлиэхтээхтэр.

«Цифровой ID» хайдах оҥоробутуй?

Анал ID-ны MAX профилыгар оҥоруохха сөп: «Цифровой ID»  киирэн «Создать QR» баттыыгыт, онтон «Госуслуги» нөҥүө киирэн, сөбүлэҥҥитин бигэргэтэҕит. Маҕаһыыннарга бу сервис икки көрүҥүнэн үлэлиир:

• API MAX нөҥүө: Каассаларга сааһы уонна чэпчэтиини аптамаатынан бигэргэтэр;
• «Госкан» нөҥүө: Судургутутуллубут көрүҥ, улахан тэхиниичэскэй холбонууну эрэйбэт. Юридическай сирэйдэр үлэһиттэригэр МЧД (машиночитаемая доверенность) суруйуохтаахтар.

Маҕаһыыннарга уонна урбаанньыттарга «MAX для партнеров» платформаҕа бэлиэтэнэллэригэр, токен ылалларыгар уонна каассаларын саҥардалларыгар сүбэлииллэр. Холонон көрөр холбонуулары туһанар кэлин хааччахтаныаҕа, ол иһин тута сөпкө холбонор ирдэнэр.

«Олус табыгастаах уонна түргэн»

Бу саҥалыы хайысханы «Пятерочка» федеральнай ситим маҕаһыыннара номнуо үлэлэригэр туһаналлар. Олохтоох маҕаһыыннар эмиэ «Госкан» нөҥүө атыылаһааччыны бигэргэтэр ньыманы сыыйа киллэрэн эрэллэр. Саҥа сервиһи дьон-сэргэ хайдах ылыммытын туһунан Дьокуускай куорат устудьуона Айсен Григорьев маннык кэпсиир:

«Урут 18+ табаары атыылаһарга каассаҕа сааскын бигэргэтээри хайаан да пааспаргын көрдөрөр буоларын. Оттон билигин MAX мессенджеры арыйан, QR-коду көрдөрдөххүнэ, кассир эн 18 сааскын туолбуккун тута көрөр. Бу олус табыгастаах уонна түргэн! Ону таһынан мин устудьуоммун, онон Цифровой ID нөҥүө чэпчэтиилээх статуспун бигэргэтэн, чэпчэтии ылыахпын сөп. Кумааҕы докумуоннары илдьэ сылдьар наадата суох, барыта төлөпүөҥҥэ баар. Биһиэхэ Саха сиригэр маннык сыыппара сервистэрэ сайдаллара олус үчүгэй».