Саха сирин тустууктара Ираҥҥа норуоттар икки ардыларынааҕы турнирга кыттыахтара

Саха сирин сэттэ тустууга Ираҥҥа норуоттар икки ардыларынааҕы турнирга кыттыаҕа. Күрэхтэһии олунньу 24-25 күннэригэр буолуоҕа диэн «Триумф» успуорка бэлэмнээх буолуу киинин пресс-сулууспата иһитиннэрэр.

Турнирга 12-лии спортсменнаах аҕыс хамаанда кыттыаҕа.

Саха сириттэн Алексей Копылов (57 кг), Петр Константинов (61 кг), Олег Фомин (70 кг), Станислав Свинобоев (74 кг), Максим Толмачев (92 кг), Ньургун Сергин (97 кг) уонна Эдуард Максимов (125 кг) тустуохтара диэн сүрүн тириэньэр э.т. Вадим Семенов иһитиннэрэр.

Турнирга кыттар аҕыс хамаанданы икки бөлөххө араарыахтара. Матчевай көрсүһүүлэр кэннилэриттэн финал уонна үһүс миэстэ иһин киирсии буолуоҕа.

Күрэхтэһии бирииһин пуондата — 40 тыһыынча дуоллар. Кыайыылаахтар 27 тыһыынча дуолларынан, үрүҥ көмүс призердар 8 тыһыынча дуолларынан уонна боруонса призердар биэс тыһыынча дуолларынан наҕараадаланыахтара.