Степан Саргыдаев: «2029 сылга диэри Ил Дархан туруорбут соруктарын ситиһиэхтээхпит»

Бүгүн, ахсынньы 21 күнүгэр, СӨ Бырабыыталыстыбатын бэрэссэдээтэлэ Кирилл Бычков Олохтоох бэйэни салайыныы сэбиэтин түмүктүүр мунньаҕын ыытта. Тэрээһиҥҥэ улуустар уонна куораттар баһылыктара кыттыыны ыллылар.

«2029 сылга диэри Ил Дархаммыт туруорбут соруктарын ситиһиэхтээхпит», — диэн Чурапчы улууһун баһылыга Степан Саргыдаев санаатын үллэһиннэ:

— Бүгүҥҥү мунньахха үс боппуруос тула кэпсэттибит. Ол курдук, Ил Дархаммыт Айсен Николаев уурааҕынан дьадайыыны утары охсуһууга илии баттааһыннаах уурааҕа тахсыбыта. Нэһилиэнньэбит дьоно-сэргэтэ дьарыктаах буолуутугар, дьоҕус уонна орто биисинэһи улаатыннарыы боппуруоһугар, маны таһынан улуустар салалталарыгар муниципальнай бырагырааммалары ылыныыга, бырайыактыыр офистары тэриниигэ сүрүн болҕомтону уурарга сыһыаннаах дьаһаллар бэриллибиттэрэ.

Бүгүн ити тула Бырабыыталыстыба бэрэссэдээтэлин солбуйааччы Георгий Степанов тыл эттэ. Үлэ күүскэ баран эрэр. Улуустарга бырайыактыыр офистар номнуо тэриллэн бэйэбит муниципальнай бырагыраамааларбытыгар тус сыаллаах индикатордаах бырагырааммалары ылынаммыт 2024 сылтан үбүлээммит үлэбитин саҕалыахпыт.  2029 сылга диэри Ил Дархаммыт Айсен Николаев туруорбут соруктарын толоруохтаахпыт.