“Сырдыгы, сылааһы саҕааччылар” кинигэ сүрэхтэниитэ буолан ааста

Сергей Васильев — Борогонскай аатынан улуустааҕы киин бибилэтиэкэ ааҕар саалатыгар «Сырдыгы, сылааһы саҕааччылар» диэн Уус Алдан улууhугар бастакы уот кэлбитэ 90, оройуоннааҕы уот ситимэ (РЭС) тэриллибитэ 45 сылларыгар аналлаах кинигэ сүрэхтэниитэ буолла.

Ааспыт үйэ ортотугар уотунан хааччыллыы, уот ситимин бастакы хардыыларын уонна билиҥҥи кэм ситиһиилэрин кэпсиир «Сырдыгы, сылааһы саҕааччылар» кинигэни өр сылларга Бороҕоннооҕу РЭС тэрилтэтигэр үлэлээбит Василий Прокопьев, Наталья Константинова, Николай Алексеев, Михаил Куличкин хомуйан, үйэлээх үлэни оҥордулар. Кинигэ «КЭМ» кинигэ кыһатыгар 150 ахсаанынан бэчээттэнэн таҕыста.

Тэрээһиҥҥэ улуус баһылыга Василий Алексеев, киин электрическэй ситимнэр дириэктэрэ Петр Иванов, «Якутскэнерго» хампаанньа электрическэй ситимнэри көрөр-истэр сулууспа кылаабынай эксперэ Иван Копырин, улуус тэрилтэлэрин салайааччылара, нэһилиэктэр баһылыктара кыттыыны ылан, эҕэрдэлэрин тиэртилэр, өр сылларга Бороҕоннооҕу РЭСкэ таһаарыылаахтык үлэлээбит үлэ бэтэрээннэригэр, үлэ бастыҥнарыгар наҕараадалары туттардылар. Бороҕоннооҕу РЭС тэрилэтигэр өр сылларга үтүө суобастаахтык үлэлээбит үлэ бэтэрээнигэр, СӨ Ытык кырдьаҕаһыгар Николай Ксенофонтовка Уус Алдан улууһун Бочуоттаах олохтооҕо аат иҥэрилиннэ, улуус социальнай-экэнэмиичэскэй сайдыытыгар кылааттарын иһин бэлиэнэн Бороҕоннооҕу РЭС бастакы салайааччыта Олег Тян, Бороҕоннооҕу РЭС тэрилтэтин бэтэрээнэ Александр Константинов наҕараадаланнылар.

Биһиги оройуоммут киинигэр Томторго 1930 сыллаахха кыһыл бартыһаан Дмитрий Алексеев — Кымахы аҕалбыт локомобилыгар, уот биэрэр генератор холбонон, улууска бастакы уот лаампалара тыкпыттара. Онтон ыла 90 сыл устата араас уустук кэмнэргэ, кыһыны-сайыны аахсыбакка эппиэтинэстээх үлэлэринэн, уот ситимин үлэһиттэрэ улуус сайдыытыгар улахан кылааты киллэрсибиттэрэ. Күн бүгүн кинилэр үлэлэрин холобур оҥостон, аныгы олох тэтиминэн эдэр дьон таһаарыылаахтык үлэлии сылдьаллар, — диэн улуус дьаһалтатын пресс-сулууспата суруйар.