Доброволец Максим Иванов: Төрөөбүт дойдуну көмүскүүр дьон наада

Усуйаана оройуоннааҕы сэбиэтин дьокутаата, «Биир Ньыгыл Арассыыйа» баартыйа чилиэнэ Максим Иванов быстах байыаннай хомуур саҕалана илигиттэн баҕа өттүнэн барарга бэлэм.  Бэбиэскэттэн аккаастаныыны кини кыбыстыы курдук көрөр.

Максим Москватааҕы университеты бүтэрбит. Кэргэннээх, түөрт оҕолоох. Дойдуну көмүскүү барарга быһаарыныы ылыныан иннинэ, Депутатскайга орто оскуолаҕа дириэктэри солбуйааччынан үлэлээбит. Кини байыаннай бэлэмнэниини  ааһан анал байыаннай эпэрээссийэ зонатыгар тиийэн «Боотур» этэрээккэ киириэхтээх.

Максим бэлиэтииринэн, чугас дьоно кини быһаарыныытын холкутук ылыммыттар.

— Билигин биһиги дойдубут, бүтүн аан дойду устуоруйата суруллар кэмэ.  Мин устуоруйа учуутала буоларым быһыытынан, туора туран хаалыахпын баҕарбаппын. Ийэ дойдубар бэриниилээх киһи буоларым быһыытынан, көмүскүүргэ бэлэммин, — диэн санаатын үллэстэр.