Төрөппүт гимназия үбүлүөйүнэн массыына бэлэхтээтэ

Дьокуускай куоракка төрөппүт күүһүнэн тэриллибит Саха гимназията  быйыл номнуо 25 сылын туолар үбүлүөйдээх үөрэх дьылыгар үктэннэ.

Ураты үөрэх дьылын төрөппүт  Василий Михайлович Филатов үөрүлэрин  өссө үрдэтэн, оскуолаҕа саҥа УАЗ массыынаны үтүө санаанан салайтаран утары уунна.

Меценат Василий Михайлович  оскуола бырайыактара улуустарга, айылҕаҕа элбэхтик тахсалларын болҕомтотугар ылан, маннык сүдү көмөнү оҥорбута олус долгутуулаах. Ол курдук «Төрөөбүт дойду устун», «Булчут үүтээнэ», «Муҥха», муус ылыыта, «Куйуур», «Подледка», «Аҕа уонна уол күрэҕэ», оскуола ыһыаҕа, «Эрчимэн Бэргэн» диэн үгэскэ кубулуйбут бырайыактары олоххо киллэрэргэ тимир көлө дьоһун күүһүнэн буолуоҕа.

Сабыс-саҥа массыынаны оскуола тэлгэһэтигэр сүүрдэн киллэрэн, «Аҕа уонна уол» стела иннигэр туруоран бэрт үөрүүлээх быһыыга-майгыга  Василий Михайлович күлүүһүн туттарда. Араас кэмҥэ оскуолаҕа көмө-тирэх буолбут аҕалар, «Ситим» эбэлэр, эһэлэр түмсүүлэрэ, учууталлар уонна үөрэнээччилэр үөрэн-көтөн ытыс үрдүгэр түһэрэн ыллылар. Ырыа ылланна, харда-махтал тыллар этиллиннилэр, үөрүү үксээтэ.

Гимназия дириэктэрэ Валентина Софронеева  гимназия эр дьон үлэһиттэрин уонна аҕаларын бииргэ түмэ тардан, ситимнээн оскуола ис-тас, иитии-үөрэтии үлэтигэр ордук таһаарыылаахтык кыттыһыннаран үлэни-хамнаһы сатабыллаахтык күүскэ тэрийэр. Оскуола тэриллиэҕиттэн үлэлиир Аҕа сүбэтин хамсааһына тиһиктээхтик уонна былааннаахтык үлэлэһэн билигин олус киэҥ ыырданан, холобур буолар үлэ уопутун мунньунна. «Аҕа сүбэтигэр көхтөөх, кыһамньылаах аҕалардаахпытынан олус киэн туттабыт. Кырдьык да эр киһи, аҕа киһи эркиннээх, тулааһыннаах буоллахха үлэ кыайыылаах буолар, норуот инники кэскилэ кэҥиир. Василий Михайлович курдук меценаттардаахпытынан киэн туттабыт! Олуһун диэн махтанабыт! Кыахтаах тимир көлөбүт, массыынабыт оҕо сайдарын туһугар сүүрдүн-көттүн, туһа буоллун!», — диэн оскуола үлэһиттэрэ махталларын тириэртилэр.