Тохсунньу ыйга буолар быыбардарга туруорунуу регистрацията түмүктэннэ
Бэҕэһээ кэлэр тохсунньу 21 күнүгэр 2024 с. анаммыт муниципальнай быыбардарга хандьыдааттары регистрациялааһын түмүктэннэ.
Ол курдук, Үөһээ Бүлүү улууһун баһылыгын болдьоҕун иннинээҕи быыбарыгар 6 хандьыдаат регистрацияланна, ол иһигэр икки киһи «Биир ньыгыл Арассыыйа» уонна «Саҥа дьон» бэлитиичэскэй баартыйалартан, түөрт – бэйэлэрэ туруоруммут дьон турдулар. Онон барыта 6 хандьыдаат регистарцияланна диэн СӨ Киин быыбардыыр хамыыһыйата иһитиннэрэр.
Эмиэ болдьоҕун иннинэ ыытыллар Кэбээйи улууһун Кировскай эбэҥки национальнай нэһилиэгин баһылыгын талыыга түөрт хандьыдаат турда. Чопчулаан эттэххэ, «Биир ньыгыл Арассыыйа» баартыйаттан биир уонна үс бэйэлэрэ туруоруммут дьон регистрацияланнылар.
Оттон болдьоҕун иннинэ ыытыллар Кэбээйи улууһун Кэбээйи нэһилиэгин баһылыгын талыыга үс хандьыдаат турда. Олортон биир – «Биир ньыгыл Арассыыйа» баартыйаттан уонна икки бэйэлэрэ туруоруммут дьон буолаллар. Кинилэр эмиэ үһүөн регистрацияны аастылар.
Сообщить об опечатке
Текст, который будет отправлен нашим редакторам: