Томпоҕо уонна Уус Маайаҕа зондировщик-сөмөлүөт үлэлиэҕэ

Бэс ыйын 13 күнүгэр Томпо уонна Уус Маайа улуустарыгар икки ойуур баһаара баар. Бу оройуоннарга зондировщик-сөмөлүөт үлэлиирэ былааннанар. Ол туһунан СӨ Бырабыыталыстыбатын бэрэссэдээтэлин бастакы солбуйааччыта Дмитрий Садовников ойууру баһаартан харыстааһыҥҥа суһал ыстаап мунньаҕар иһитиннэрдэ.

«Билиҥҥи кэмҥэ ойуур баһаардара Томпо уонна Уус Маайа улуустарыгар умайаллар. Бу  оройуоннарга ардаҕы ыҥырар сөмөлүөт үлэлиирэ былааннанар. Былырыын бу кэмҥэ Саха сиригэр 82 ойуур баһаара бэлиэтэммит буоллаҕына, быйыл уопсайа 31. Көрдөрүү намтаабат, ол эрээри былырыыҥҥы көрдөрүүнэн улахан баһаардар  бэс ыйын 20-с күннэригэр тахсыахтарын сөп. Ол иһин биһиги балаһыанньаны өрүү кэтээн көрөбүт, оройуоннары кытары ыкса үлэни ыытабыт», — диэн Дмитрий Садовников эттэ.

Суһал ыстаап дааннайдарынан, бүгүн Уус Маайа уонна Томпо оройуоннарыгар уопсайа 27,5 иэннээх икки ойуур баһаарын умуруорууга үлэ ыытыллар.