Туһалаах үөрүйэхтэр былааннарын оҥосто үөрэниэххэ (психолог сүбэтэ)

Бэйэҥ олоххун үчүгэй өттүгэр уларытарга саамай судургу ньыма —  эйигин өссө сайыннарар уонна  күүстээх оҥорор үөрүйэхтэри билиэххэ уонна туһаныахха.

Наркология өрөспүүбүлүкэтээҕи диспансерын килиниичэскэй психолога Виктория Филиппова маннык сүбэлиир:

—Туһалаах үөрүйэхтэр былааннарын оҥостуоҥ иннинэ  олоххор уларыйыыны ирдиир эйгэҕин талыаххын наада.

Уларыйыахтаах эйгэҕин талан баран, ону сайыннарар былаанна оҥоһун, ол эбэтэр хас да соругу бэлиэтээ.

Онтон ол соруктартан биири тал уонна 1-2 ый устата күн аайы ону толоро сырыт.  Ол сыыйа-баайа  үгэскэ кубулуйуоҕа.

Биир сорук туоллаҕына, аныгыскы соругу толорорго дьулуһуохха. Хас да соругу тута сөрөөн толоро сатаама. Ситиһиилэргин бэлиэтэн уонна барыта табылларыгар эрэллээх буол.