«Уйгу» — төрүт үгэс биһигэ

«Эбээ, эһээ оскуолатыгар сахалыы үөрэтэр үһүлэр, хата, онно куораттан кэлбит нууччалыы саҥарар сиэннэрбитин биэрэрбит дуу…» — диэн сурах Төхтүр иһин тилийэ көппүтэ. Мэҥэ Хаҥалас Төхтүрүгэр «Уйгу» түөлбэтэ улуус бэтэрээннэрин сэбиэтин чэрчитинэн , «Билиибин-көрүүбүн ыччаппар аныыбын» диэн бырайыагынан эбэлэр, эһэлэр бэйэлэрин кыахтарынан 10 күннээх оскуолаларын сүбэлэһэн тэрийбиттэрэ.

«Уйгу» түөлбэ салайааччыта Анна Матвеевна Винокурова;
— Күнүс эбиэт кэннэ, 3 чаас устата, куораттан, атын улуустан кэлэн сайылыы сылдьар, нууччалыы кэпсэтэр сиэннэри сахалыы тылга, үгэскэ, сиэргэ-туомҥа, айылҕалыын алтыһыыга, норуот уус уран айымньыларын көрүҥнэрин билиһиннэриигэ уо.д.а. сатабылларга уһуйар сыаллаах-соруктаах саҕалаабыппыт онтубут сыалын ситтэ диэн бу түмүк күн оҕолорбут эҕэрдэ, махтал кэнсиэрдэриттэн санаабыт көтөҕүлүннэ.

Оҕо болҕомтотун тардар араас тэрээһиннэри , устуорук идэлээх, туспа айар куттаах, Ымыылаах Күндү Харысхал миэхэ күүс-көмө буолан былааннаан үлэлэттэ. Манна күннэринэн үллэрэн тустаах дьону кытта кэпсэтэн, аат ааттаан ыҥыран оҕолорбутун сахалыы тыыҥҥа уһуйдубут. «Төрөөбүт тыл сүмэтэ» бэсиэдэни — Екатерина Павловна Винокурова, «Улууска араас сылларга бэчээттэнэн тахсыбыт айар дьоҕурдаах оҕолор айымньыларын кытта билиһиннэрии» — Августина Хабарова, » Норуот тылынан уус уран айымньыта» — Марфа Федотовна Аммосова, «Сахалыы остуол оонньуулара» — Ася Потапова. 10 кылаас, «Эмтээх оттору хомуйуу уонна таба туһаныы» — Лариса Михайловна Ноговицына, «Ийэ айылҕаҕа харыстабыллаах сыһыан» — Дария Аркадьевна Степанова, балыктааһын, «Өбүгэ оонньуута» — Иван Ипатьевич Ермолаев, кылтан, сиэлтэн оҥоһуктары туохха, хайдах тутталларын туһунан Саргылаана Иннокентьевна Иванова, былыр өбүгэлэрбит туостан хайдах иһити оҥороллоругар Ирина Ефремовна Шергина сэргэх дьарыктары ыыттылар.

Анна Андреевна Холмогорова сыт таһааран атырдьах ыйын сиэрин туомун толору быһааран кэпсээтэ, Василий Васильевич Винокуров от үлэтин, Зыковтар дьиэ кэргэн саха ыалыгар сүөһү иитиитин туһунан, Ымыылаах Күндү Харысхал төрүт дьарык, иис арааһыгар маастар кылааһы ыытан, тутан-хабан илэ көрдөрөн, сүбэ-ама биэрдилэр.

10 күннээх эбэлэр,эһэлэр оскуолаларын эҕэрдэ кэнсиэрин гитара доҕуһуолунан ыллыыр дьоҕурдаах, эйэҕэс эбэ Елена Игнатьевна Находкина бэлэмнээн туруорбутун көрөөччүлэр дохсун ытыс тыаһынан махтаннылар. Елена Игнатьевна харда тылыгар тэрийээччилэргэ махтанан төрөппүттэр ааттарыттан минньигэс бэлэҕи туттарда.Бу күҥҥэ анаан оҕолор илиилэринэн тутан-хабан таһаарбыт эркин хаһыаттара сэҥээрилиннэ.

«Уйгу» түөлбэ аатыттан Анна Винокурова үөрүүлээх быһыыга-майгыга кыттыбыт бары оҕолорго туоһу сурук туттарда. Ити кэнниттэн дьиэлээх хаһаайка Лариса Михайловна Ноговицына толору астаах сахалыы сандалытын тула олорон санааларын үллэһиннилэр, аны сайын хайаан да кэлиэх буолан тарҕастылар.

Анна Матвеевна Винокурова салайааччылаах «Уйгу» түөлбэ маҥнайгы саҕалааһына нууччалыы кэпсэтэр сиэннэрдээх, оҕолордоох үгүс эбэ, эһэ, төрөппүт сэҥээриитин ылыан ылла. Инникитин, маннык суолталаах, туһалаах эбэлэр, эһэлэр оскуолалара атын да түөлбэлэргэ ыытыллара буоллар диэн ыра санаалаах тарҕастылар.

«Уйгу» түөлбэ аатыттан Анна Винокурова үөрүүлээх быһыыга-майгыга кыттыбыт бары оҕолорго туоһу суруктары туттарда. Ити кэнниттэн эйэҕэс майгылаах, үөрүнньэҥ дьиэлээх хаһаайка Лариса Михайловна Ноговицына толору астаах сахалыы сандалытын тула олорон санааларын үллэһиннилэр, аны сайын хайаан да кэлиэх буолан тарҕастылар.
Анна Матвеевна Винокурова салайааччылаах «Уйгу» түөлбэ маҥнайгы саҕалааһына нууччалыы кэпсэтэр сиэннэрдээх, оҕолордоох үгүс эбэ, эһэ, төрөппүт сэҥээриитин ылыан ылла.
Кыттааччылар, инникитин да маннык курдук ис хоһоонноох, суолталаах эбэлэр, эһэлэр оскуолалара атын да түөлбэлэргэ ыытыллара буоллар диэн ыра санаалаах
тарҕастылар.

Августина Владимирова-Хабарова.