Уолларын суохтаппатылар

Сииттэ нэһилиэгэр байыаннай дьайыыга сылдьар оҕолоох Елена, Афанасий Новгородовтарга кыстык хаар түһүөн иннинэ биир дойдулаахтара, аймах-билэ дьонноро, бииргэ үөрэммит үөлээннээхтэрэ уонна олохтоох дьаһалта үлэһиттэрэ түмсэннэр, киэҥ-куоҥ, саҥа кырасыабай күүлэни тутан, дьиэлэрин сарайын олоччу  уларытан кэбистилэр.

“Бу иннинэ эргэ тутуу буолан хаар, ардах үргүлдьү күүлэйдиир этэ. Ыал аҕата инбэлиит, ийэлэрэ сиэнин көрөн олороллор. Хаһаайыстыбаларын өрө тардар, көрөр-истэр соҕотох уоллара мобилизациянан байыаннай дьайыыга барбыта номнуо ыраатта. Биир дойдулаахтара оҕолорун суохтаппакка бары үлэлэригэр күүс-көмө, болҕомто уурар буоланнар, дьиэлээхтэр тирэхтээхпит диэн үөрэллэр, — диэн кэпсиир А.В. Аргунов аатынан Норуот айымньытын, култууратын  дьиэтин дириэктэрэ Марианна Сивцева. — Нэһилиэккэ баар социальнай ситимнэр нөҥүө чугас аймахтарыгар, олохтоох дьаһалта баһылыгар Семен Тимофеевка, солбуйааччыта Петр Степановка, Семен, Егор Левиннэргэ, Дмитрий Колмогоровка, Егор Ивановка, Яков Новгородовка, Семен Новгородовка ис сүрэхтэриттэн  махтаналлар. Ити курдук инникитин да үтүө санаа баһыйан, уйан сүрэх сылаанньыйан, бар дьоҥҥутун өйүү-өйдүү сылдьыҥ диэн баҕа санаа бастыҥын тиэрдэллэр”.