Уус Алдаҥҥа Николай Тарскай пааматынньыга аһылынна

Бүгүн, ыам ыйын 8 күнүгэр, Саха сиригэр биллэр судаарыстыбаннай диэйэтэл, физкултуурунай-успуорт хамсааһынын тэрийээччи Николай Николаевич Тарскай төрөөбүтэ 100 сылыгар анаммыт Уус Алдан улууһугар үөрүүлээх тэрээһиннэр ыытылыннылар.

Бу бэлиэ күн Николай Николаевич Тарскай аатын сүгэр  успуорт комплексын иннигэр Саха сиригэр физкултуурунай-успуорт хамсааһынын саҕалааччыга пааматынньык туруоруутун аһыллыыта буолла.

Тэрээһин кыттыылаахтарыгар туһаайан бырабыыталыстыба бэрэссэдээтэлин солбуйааччы Сергей Местников бэлиэтээбитинэн, Саха сиригэр уопсастыбаннас көҕүлээһининэн уонна Ил Дархан өйөбүлүнэн Николай Николаевич Тарскай аатын үйэтитиигэ улахан үлэ ыытыллар.

«Николай Николаевич Тарскай өрөспүүбүлүкэ уонна дойду улахан патриота этэ. Саха сиригэр физическай култуура уонна успуорт олимпийскай, национальнай көрүҥнэрин сайыннарыыга дьоһун кылааты киллэрсибитэ. Саха сиригэр олимпийскай чөмпүйүөннэр баар буолуохтара уонна үрдүкү кылаастаах маастардар успуорт араас көрүҥүнэн маассабайдык дьарыктаныахтара диэн итэҕэйэрэ. Бүгүн Тарскай баҕа санаалара туолла — Саха сирэ спортсменнарын ситиһиилэринэн киэн туттар. Биһиги сүрүн сыалбытынан Саха сиригэр физкултуурунай хамсааһыны төрүттээччилэртэн биирдэстэрэ, эдэр көлүөнэ ортотугар биллиилээх уопсастыбаннай-бэлитиичэскэй диэйэтэл Николай Николаевич Тарскай аатын үйэтитии буолар», — диэтэ Сергей Местников.

Бу күн Николай Николаевич Тарскай үбүлүөйүгэр аналлаах аһаҕас уруоктарга улуус араас оскуолаларыттан 1007 үөрэнээччи кыттыыны ылла. Н. Н. Тарскай аатынан Баатаҕай орто оскуолатын үөрэнээччилэрэ бэйэлэрин нэһилиэктэрин олохторун-дьаһахтарын, үлэлэрин- хамнастарын туһунан кэпсээтилэр.