ВЭФ-2026: «Уһук Илин уулуссата» быыстапкаҕа 50 тыһыынчаттан тахса киһи сырытта

Илиҥҥи экэнэмиичэскэй пуорум чэрчитинэн ыытыллыбыт «Уһук Илин уулуссата» быыстапкаҕа 50 тыһыынчаттан тахса киһи сырытта. Быыстапка балаҕан ыйын 1-7 күннэригэр Илиҥҥи экэнэмиичэскэй пуорум иитинэн ыытыллыбыта. 

Владивостокка ВЭФ-2026 чэрчитинэн ыытыллыбыт «Уһук Илин уулуссата» диэн улахан быыстапка үлэтэ түмүктэннэ. Тиэмэтэ — Арассыыйа Норуоттарын сомоҕолоһууларын сыла. Биир нэдиэлэ устатыгар 50 тыһыынчаттан тахса киһи сырытта, көрдө-иһиттэ. Бырайыагы көҕүлээччинэн РФ Бырабыыталыстыбатын Бэрэссэдээтэлин солбуйааччы — РФ Бэрэсидьиэнин Уһук Илин ФУо боломуочуйалаах бэрэстэбиитэлэ, быыстапка тэрийэр кэмитиэтин салайааччыта Юрий Трутнев.

Саха Өрөспүүбүлүкэтин «За счастьем в Якутию» киэҥ далааһыннаах павильона аныгы технологиялар, креативнай индустриялар уонна научнай нэһилиэстибэ Хоту дойду усулуобуйатыгар ситиһиилээхтик сайдан, инвестициялары тардан, туристары угуйан иһэллэрин дьэҥкэтик көрдөрдө. Экспозиция сүрүн уонна дириҥ ис хоһоонноох, сөҕүүнү-махтайыыны ылбыт, болҕомтону тардыбыт экспонатынан СӨ наукаларын Академиятыттан Чурапчы сэлиитин көрдөрүүлэрэ уонна «Саюри» хампаанньа тропическай үүнээйилэрэ буоллулар. Үгэс буолбут толбоннуран көстөр ураһа, ол иһигэр пальма, банан үүнэн тураллара дьону-сэргэни сөхтөрүөн сөхтөрдө. Бу көннөрү хартыына, декорация буолбатах: лоп курдук 10 сыл анараа өттүгэр, ВЭФ-2016, бу бырайыакка бастакы сөбүлэҥҥэ илии баттаммыта.

—Илиҥҥи экэнэмиичэскэй пуорумҥа кэлбит инвестордар, экэнэмиистэр, эспиэрдэр, политическай уонна уопсастыбаннай диэйэтэллэр Приморье кыраайын, Владивостогу билэллэрин-көрөллөрүн таһынан, өссө экэнэмиичэскэй кыахтары, куораттары саҥардыыны, Уһук Илин сиригэр-уотугар баар туризмы, култуураларын туһунан өйдөбүлү ылалларын туһугар «Уһук Илин уулуссата» быыстапканы тэрийдибит, — диэн этэр быыстапка тэрийэр кэмитиэтин салайааччыта Юрий Трутнев.

Салгыы «Карта будущей Якутии» интерактивнай каартаҕа — Табаҕа тумула, Өлүөнэ муостата, сэлии Аан дойдутааҕы киинэ уонна «Дальний Восток — Земля приключений» куонкурус маршрута бааллар. Куйаар тематическай зоналарга арахсыбыт: «Инвестируй в Якутию», «Открой Якутию», «Сделано в Якутии», «Якутия — Земля Героев».

Маны сэргэ, былаһааккаҕа РФ успуордун министиэристибэтин «Дом спорта» уонна «Арена ГТО» истиэндэлэрэ, Арассыыйа министиэристибэтин Федерациятын Уһук Илини уонна Арктиканы сайыннарыыга министиэристибэтин, Уһук Илини уонна Арктиканы сайыннарыы Корпорациятын холбоһуктаах павильона «Развиваем Дальний», Туризм.РФ павильона, «Дом сокола», «ВОИН» киин экспозицията көрдөрүлүннүлэр. Приморье кыраайа Балык ырыынагын үлэтин тэрийбитин сэргээтилэр.

Быыстапка түмэр тиэмэтинэн Арассыыйаҕа Норуоттар сомоҕолоһууларын сыла буолла. Павильоннарга артыыстар, кэлэктииптэр кэнсиэртэрэ тэриллибиттэр.

XI Илиҥҥи экэнэмиичэскэй пуорум балаҕан ыйын 1-4 күннэригэр Владивостокка Уһук Илиннээҕи федеральнай университет кампуһун былаһааккатыгар буолла. Пуорум сүрүн тиэмэтэ: «Уһук Илин — дьон туһугар сайдыы». Илиҥҥи экэнэмиичэскэй пуоруму тэрийдэ — РФ Бырабыыталыстыбатын өйөбүлүнэн Росконгресс пуондата.