видеоттан скрин
Дьоппуоҥҥа ыытыллыбыт Азия оонньууларыгар Саха сирин тустуутун оскуолатын иитиллээччилэрэ Айаал Белолюбскай уонна Виктор Рассадин боруонса мэтээллэри ыллылар. Кинилэр үһүс миэстэ иһин уустук, тыҥааһыннаах хапсыһыыларга кыайыыны ситистилэр диэн sakha.gov.ru иһитиннэрэр.
Айаал Белолюбскай 57 киилэҕэ диэри ыйааһыҥҥа ситиһиилээхтик туһунна. Кини Ирантан Али Моменижоужадены (4:1) уонна Кэриэйэттэн Сунг Гвон Кими (6:2) кыайда. Ол эрээри полуфиналга Олимпиада призеругар, Индия тустуугугар Аман Сехраватка (8:14) кыайтарда. Хапсыһыы саҕаланыытыгар Айаал бастаан испитэ. Индия тустууга түмүгэр Хотугу Кэриэйэттэн (КНДР) аан дойду чөмпүйүөнүн Хан Чон Сону (11:7) кыайан, Азия оонньууларын кыайыылааҕынан буолла.
Боруонса мэтээл иһин тустууга Дьоппуон чөмпүйүөнэ Ямото Огава утарсааччытынан таҕыста. Хапсыһыы олус уустуктук ааста. Ол эрээри түмүгэр Айаал 1:1 ахсаанынан күрэхтэһиини ыытар дойду тустуугун хотто. Инньэ гынан бэйэтин карьератыгар маннык улахан таһымнаах күрэхтэһиигэ маҥнайгы боруонса мэтээлин ылла.
Виктор Рассадин 74 киилэҕэ диэри ыйааһыҥҥа күрэхтэстэ. 1/8 финалга кини Бахрейнтан Магомедрасул Аслуевы 3:2 ахсаанынан хотто, ол эрээри салгыы аан дойду чөмпүйүөнүгэр, дьоппуон Есиносукэ Аоягига (0:10) хоттордо. Салгыы Индонезияттан Гиланг Илхазаны эрэллээхтик кыайан (10:0), үһүс миэстэ иһин тустар кыахтанна.
Боруонса мэтээл иһин киирсиигэ Рассадин Кыргызстан тустуугун Орозобек Токтомамбетовы кытта көрүстэ. Бастакы түһүмэх 1:0 ахсаанынан кыргыз тустуугун кыайыытынан түмүктэннэ. Иккискэ Рассадин ахсааны тэҥнээтэ уонна хаачыстыбатынан инники таҕыста.
Хапсыһыы бүтүө 6 сөкүүндэ хаалбытын кэннэ Токтомамбетов атаакалаан (ахсаан 3:1 буолла), ол эрээри саха уолугар хаалбыт 3 сөкүүндэ кэмигэр утары атааканы оҥорон, ахсааны 3:3 оҥорорго кыах тиийдэ. Түмүгэр Рассадин хаачыстыбатынан кыайыыны ылла. Утарсааччытын секундааннара мөккүһэн челлендж бырахтылар да, ол бигэргэтиллибэтэ — бүтэһиктээх ахсаан 4:3 буолла. Виктор Рассадин эмиэ маҥнайгытын Азия оонньууларын боруонса призерунан буолла.
Өрөспүүбүлүкэ нэһилиэнньэлээх пууннара массыына кыһыҥҥы суола аһыллыар диэри ирдэнэр кээмэйдээх оттук-энэргэтиическэй саппааһынан олоччу хааччылыннылар. Бу…
«Күн бүгүн эрэгийиэн иһинээҕи көтүүлэри үбүлээһин өрөспүүбүлүкэ бүддьүөтүн суотугар эрэ ыытыллар. Бу сыалга 250 мөлүйүөн…
Арассыыйаҕа массыына атыылаһарга чэпчэтиилээх кирэдьииттээһин хас даҕаны судаарыстыбаннай бырагыраама үлэлиир. Ону туһанан саҥа массыынаны атыылаһыахха…
Бу күннэргэ Горнай улууһун Бэрдьигэстээх сэлиэнньэтин ыччаттара нэһилиэк сэбиэтэ тэриллибит күнүн бэлиэтээтилэр. Бу туһунан Бэрдьигэстээх…
Сэтинньи 4-6 күннэригэр Дьокуускайга Сомоҕолоһуу күнүгэр аналлаах норуот уус-уран оҥоһуктарыгар босхо маастар-кылаастары ыытыахтара. Тэрээһини «Мин…
Өлүөнэ муостатын тутар былаһааккаҕа өрүс флотун муус туруон иннинээҕи үлэтэ түмүктэннэ. Ааспыт сезон устата 20-чэ…