Вячеслав Емельянов саҥа ыйаах тула санаатын үллэһиннэ

СӨ коммунальнай хаһаайыстыбатын уонна энергетикатын миниистирэ Вячеслав Емельянов Ил Дархан Айсен Николаев таһаарбыт стратегическай ыйааҕын туһунан бэйэтин телеграм-ханаалыгар суруйда.

Бэҕэһээ Ил Дархан саҥа стратегическай ыйаахха илии баттаата. Бу ыйаахха бастакы уочарат болҕомто ууруллуохтаах эйгэлэрэ ыйыллыбыттар, ол иһигэр өрөспүүбүлүкэ энергетикатын инфраструктуратын сайыннарыы.

Энергетика эйгэтигэр бастакы уочараттаах бырайыактар истэригэр ыйыллыбыттар: Усуйаана улууһугар тутуллуохтаах дьоҕус кыамталаах атомнай ыстаансыйа; 2028 сылга тутуллуохтаах 550 МВт кыамталаах “Новоленскай” ТЭС; 330 МВт кыамталаах Чульманнааҕы ТЭС; Дьокуускайдааҕы  ГРЭС-2 иккис уочаратын тутуулара; 66 дизельнэй ыстаансыйалары саҥардыы.

Ону тэҥэ энергетика уонна коммунальнай хаһаайыстыба эйгэтигэр саахал тахсыытын уонна эргэрии туругун ааспыт сылларга тэҥнээн 10% кыччатыы сорудах быһыытынан турбут.