Үлэ чааһын таһынан үлэлииргэ төлөбүр үрдүк буолуохтаах

Бэрэсидьиэн Владимир Путин үлэ чааһын таһынан үлэлииргэ төлөбүр кээмэйин чуолкайдыыр сокуоҥҥа илии баттаата. Бу докумуону РФ бырабыыталыстыбата Конституционнай суут уурааҕын толорон, оҥорбута.

Суут Үлэ кодексын 152-с ыстатыйатын 1 чааһа Конституцияҕа сөп түбэспэтин быһаарбыт. Бу чэрчитинэн, үлэ чааһын таһынан үлэлииргэ төлөбүр хамнастан эрэ тирэнэн, тарыып ыстаапката уонна хамнас акылаата толуйар уонна көҕүлүүр төлөбүрдэрэ (стимулирующие и компенсационные выплаты) суох ааҕыллаллара сөбө суоҕун ыйбыт.

Үлэ чааһын кэнниттэн уонна түүннэри үлэлииргэ төлөбүр хамнаска киирсиэ суохтаах. Бу төлөбүр хамнас алын кээмэйигэр (МРОТ) киирсэр буоллаҕына, Конституцияны утарар.

Сокуон быһыытынан, үлэ чааһын таһынан үлэни төлүүргэ толуйар уонна көҕүлүүр төлөбүрдэри киллэрэн туран, хамнас кээмэйиттэн ааҕыллыахтаах. Икки бастакы чааска — балтараа төгүл, онтон кэлэр чаастарга — икки төгүл үрдүк кээмэйинэн ааҕыллыахтаах.