Ымманыйар тыллары сахалыы саҥарыахха

Маҥнай тэлэбиисэр дьайыытынан, онтон интэриниэт сайдыытынан, сахалыы кинигэни ааҕыы, бэйэ ыккардыгар сахалыы кэпсэтии кэлин сылларга биллэрдик намыһах таһымҥа түстэ.

Уһуйаан сааһыттан саҕалаан оҕо, эдэр ыччат баһыйар өттө нууччалыы кэпсэтиигэ, ааҕыыга көстө. Бу бүгүҥҥү олохпут ирдэбилэ дуу, эбэтэр атын төрүөт баар дуу? Хайа да омук бэйэтин сүтэриэн баҕарбат буоллаҕына, төрөөбүт тылын өрө тутуохтаах, салгыы сайыннарыахтаах. Төрөөбүт тыл, киһи, омук салгыы сайдыытыгар бигэ тирэх, өйөбүл буолар.

Тиһигин быспакка ыытыллар араас таһымнаах тэрээһиннэр көдьүүстэрэ кырата көһүннэ. Саха тыла салгыы сайдарын туһугар тугу гыныахха, туох дьаһаллары ылыахха сөбүй!

Мин тус санаабар, биир суол баар. Ол — төрөппүттэр саха тыла сайдыытыгар ис сүрэхтэриттэн ылынан үлэлэһиилэрэ. Ол үлэлэрин ис хоһооно тугуй? Оҕо төрүөҕүттэн таптыыр, ымманыйар тыллары сахалыы саҥарыахха, онтон тылланыытыттан саҕалаан, оҕону кытары наар сахалыы кэпсэтиэххэ. Саха тылын суолтатын, төһө кыалларынан, быһаарыахха, өйдөтүөххэ. Оҕотун иитиигэ төрөппүт бастакы буолуохтаах. Иитии-үөрэтии үлэтин аҥаардастыы уһуйааҥҥа, оскуолаҕа кэлтэйдии соҥнооһун сыыһа суол буолар.

Баҕар, сороххут оҕом кыра сааһыттан нууччалыы саҥарбатаҕына сайдыыта бытаарыа дии саныаҕа. Оннук буолбатах. Үөрэнэр сылларыгар оскуола нуучча, омук тылларыгар толору билиини биэриэҕэ. Онон төрөппүттэри сахабыт тыла салгыы сайдыытыгар турунуҥ диэн ыҥырабын.

Владимир Дьячковскай.

Чурапчы, Сылаҥ.

Сиһилии «Саха сирэ» хаһыат кулун тутар 13 күнүнээҕи нүөмэригэр ааҕыҥ