Юрий Трутнев: «Арассыыйа-Кытай ЭКСПО-та — икки өрүттээх сыһыаннаһыыны сайыннарыыга суолталаах уонна туһалаах былаһаакка»

Харбиҥҥа РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин УИФУо боломуочуйалаах бэрэстэбиитэлэ Юрий Трутнев уонна КНР Судаарыстыбаннай сэбиэтин Премьерин солбуйааччы Чжан Гоцин  дьоһун суолталаах эргиэн-бырамыысыланнас платформатынан буолбут X Арассыыйа-Кытай ЭКСПО-тын арыйдылар. Юрий Трутнев тэрээһин кыттыылаахтарыгар уонна тэрийээччилэригэр анаан Арассыыйа Бэрэсидьиэнин Владимир Путин эҕэрдэтин ааҕан иһитиннэрдэ. Чжан Гоцин КНР Бэрэссэдээтэлин Си Цзиньпин эҕэрдэтин тириэртэ.

Үөрүүлээх сиэр-туом кэнниттэн Юрий Трутнев уонна Чжан Гоцин Кытай уонна Арассыыйа туруорбут экспозицияларын кэрийэн көрдүлэр.

“Арассыыйа-Кытай ЭКСПО-та – икки өрүттээх сыһыаннаһыыны сайыннарыыга дьоһун суолталаах былаһаакка. Экспозицияҕа Арассыыйаттан бөртөлүөтү киллэрэн туран, дойдуга оҥоһуллубут тиэхиньикэ уонна технологическай ситиһиилэр көрдөрүлүннүлэр. Биһиги дойдуларбыт икки ардыларыгар хардарыта үлэбитин салгыахтаахпыт, технологияларбытын атастаһыахпытын наада”, — диэтэ Юрий Трутнев.

ЭКСПО РФ Бырамыысыланнаска уонна эргиэҥҥэ министиэристибэтин уонна РФ Экэниэмикэни сайыннарыыга министиэристибэтин өйөбүллэринэн ыытыллар, Кытай өттүттэн тэрийээччилэр – КНР Кэмиэрсийэтин министиэристибэтэ, Хэйлунцзян провинциятын Норуодунай бырабыыталыстыбата.

Быйыл Арассыыйа-Кытай быыстапкатын экспозицияларын уопсай иэнэ 12 тыһ. кв. миэтэрэҕэ тэҥнэһэр. Арассыыйа киэнэ мантан – 4,5 тыһ. кв.м. Манна 250 тэрилтэ кыттар. Ол курдук, —  Арассыыйа биллэр хампаанньалара, ВТБ,  “Ростех” ГК уонна  Альфа-Банк. Арассыыйа 16 эрэгийиэнэ кыттара кэрэхсэбиллээх:  Амур, Архангельскай, Мурманскай, Рязанскай, Свердловскай, Тверской уобаластар, Москва куорат, Забайкальскай, Камчатскай, Хабаровскай, Приморскай кыраайдар, Бурятия, Коми, Саха сирэ, Татарстан Өрөспүүбүлүкэлэрэ, ХМАО-Югра. Партнер-эрэгийиэнинэн Москва куорат кыттар, Кытай өттүттэн — Гуандун уонна Цзянси провинциялара.

“Харбиҥҥа ЭКСПО-ҕа биһиги экспозициябыт көннөрү истиэндэ буолбатах, бу Саха сирэ Илин диэки стратегическай хайыһыытын бэлиэтэ. “Железные дороги Якутии – рельсы дружбы” диэн аат тырааныспарынан сибээстэһии – инвестиция уонна гуманитарнай бииргэ үлэлэһии тирэҕин көрдөрөр.  Биһиги өрөспүүбүлүкэбитин норуоттар икки ардыларынааҕы саҥа көрүдүөр тутаах тиһигин курдук көрдөрөбүт. “Джалинда – Мохэ” – бу суол эрэ буолбатах, бу Кытайга Хотугу муора суолугар уонна Уһук Илин баайыгар-дуолугар тахсар быһа суол. Биһиги сыалбыт – партнердарбыт биһигини хардарыта сайдыыга бигэ, аныгылыы көрүүлээх уонна култуура өттүнэн союзник курдук көрөллөрүн ситиһии”, — диэтэ Айсен Николаев.

Сиһилии: https://www.sakha.gov.ru/news/48697