Ааспыт сылга Саха сиригэр 9 тыһыынча кэриҥэ ыал Уһук Илиҥҥи ипотеканан туһаммыт

2023 сыл түмүгүнэн икки бырыһыаннаах Уһук Илиҥҥи ипотеканан 8882 Саха сирин ыала туһаммыт. Бу туһунан СӨ Тутууга миниистирэ Виктор Романов иһитиннэрэр.

«2023 сыл иһигэр барыта 47,3 млрд солк. суумаҕа 8882 кирэдьиит бэриллибит. Ол иһигэр олорор дьиэни туттуу бырагырааматынан 19,1 млрд солк. суумаҕа 3 449 кирэдьиит оҥоһуллубут», — диэн Романов иһитиннэрэр.

Кини этэринэн, бырагыраама олохтонуоҕуттан Саха сиригэр барыта 103,7 млрд солк. суумаҕа 21 тыһыынча ипотека бэриллибит.

Уһук Илиҥҥи ипотека тиэмэтэ бу күннэргэ Юрий Трутнев ыыппыт «тохсунньутааҕы мунньахха» биир сүрүн боппуруоһунан буолбут. Уһук Илиҥҥэ РФ Бэрэсидьиэнин боломуочуйалаах бэрэстэбиитэлэ — РФ Бырабыыталыстыбатын бэрэссэдээтэлин солбуйааччы бэлиэтээбитинэн, бу чэпчэтиилээх бырагырааманан 100 тыһыынча кэриҥэ ыал дьиэ атыыласпыт уонна туттубут эбит.

Бу бырагыраама баар буолан, Уһук Илиҥҥи уокурукка дьиэни тутуу көрдөрүүтэ 25% үрдээбит. Өрөспүүбүлүкэбит тутууга үс бастыҥ көрдөрүүлээхтэр истэригэр киирэр.

Санатан суруйдахха, «Уһук Илиҥҥи ипотека» Владимир Путин көҕүлээһининэн 2019 сыллаахха баар буолбута.