Александр Степанов: «Ньурбабыт улууhугар ааспыт сылларга утуу-субуу социальнай эбийиэктэр үлэҕэ кииритэлээтилэр»

Ыам ыйын 29 күнүгэр Ил Дархан Айсен Николаев дойду Бэрэсидьиэнин кытары көрсөн өрөспүүбүлүкэ олоҕун-дьаһаҕын, инники кэскилин туһунан кэпсэппитэ. Ол туһунан Ньурба улууһун Малдьаҕар нэһилигин баһылыга Александр Степанов санаатын үллэстэр:

— Быйыл 2023 сылга өрөспүүбүлүкэбитигэр элбэх политическай быһаарыылардаах түгэннэр буолаары тураллар. Ол курдук, аны күhүн биhиги Ил Дархаммытын, Ил Түмэммитин талыахпыт, маны таhынан элбэх муниципальнай таhымнаах быыбардар буолуохтара.

Ил Дархан быыбарыгар Айсен Николаев иккис болдьоҕор турунарын биһиги, биллэн турар, өйүүбүт. Тоҕо диэҥҥэ бэрт кылгастык санаабын этиим. Ааспыт 2020-22 сыллардааҕы улахан тургутуулар, ол иһигэр, COVID-19 дьаҥ туруутун, анал байыаннай дьайыы саҕаланыытын, ойуур баhаардарын, сааскы халааннар, арҕааҥҥы дойдулар экономическай саансыйаларын уо.д.а. — барыта түмүллүбүт кэмэ. Бу сыллар кимиэхэ барытыгар, ол иһигэр, Ил Дархаҥҥа, бары салалтаҕа, тэрилтэлэргэ, нэһилиэнньэҕэ ыараханнык дьааһыйан аастылар. Элбэҕи эридьиэстээбэккэ эрэ, быһатын эттэхпинэ, бу уустук уонна ыарахан сыллары биhиги Ил Дархаммыт А.С. Николаев сөптөөхтүк дьаhанан, үлэ хаамыытын кэмигэр тута сөпкө аттаран ыытан, ити күчүмэҕэй кэмнэри этэҥҥэ туораатыбыт дии саныыбын.

Төһө да итинник кэм турдар, биhиги Ньурбабыт улууhугар ааспыт сылларга утуу-субуу социальнай эбийиэктэр үлэҕэ кииритэлээтилэр. Бу барыта Ил Дархаммыт А.С. Николаев уонна миэстэтигэр улууспут Аҕа баhылыга А.М. Иннокентьев биир хайысханан, биир санаанан үлэлээбиттэрин үтүө түмүгэ буоллар дии саныыбын. Маны тэҥэ салгыы биhиги улууспутугар кэлэр сылларга өссө атын социальнай тутуулар барыахтаахтарын сэргии истэбит уонна кэтэhэбит.

Биhиги, малдьаҕардар, кэлэр сылларга оскуолабыт тутуутун долгуйа күүтэбит. Күн бүгүн тутуллуохтаах сирин чинчийии үлэлэрэ түмүктэнэн, бырайыактыы үлэлэрэ бу сылга саҕаланыахтаах. Оҕолорбут кэскиллэрин уһанар-уһуйар, үөрэтэр-сайыннарар аныгылыы тутуулаах, саҥа, сырдык, үчүгэй оскуолаҕа үөрэнэллэригэр бу үчүгэй хардыы, дьоһун олук диэн олохтоохторбут үөрэ күүтэллэр. Маннык хабааннаах улахан да, кыра да үлэлэр өрөспүүбүлүкэбит бары муннуктарыгар, киин да, кырыы да улуустарыгар, ыраах-чугас нэһилиэктэригэр ыытылла тураллар.

Сахабыт дьоно-сэргэтэ билиҥҥи курдук ыарахан кэмҥэ норуотун туhугар ис-сүрэҕиттэн кыhаллар салайааччы кэмигэр кэлэн үлэлии-хамныы сылдьарын өйдүөхтээхпит, өйүөхтээхпит. Биһиги Айсен Сергеевич иккис болдьоҕор хайаан да барарын баҕарабыт уонна кини салгыы үлэлиир быһаарыныытын өйүүрбүтүн биллэрэбит.
Сахалар Ил Дархаммыт А.С. Николаев тула түмсүөҕүҥ, биир санаанан өйөөн, салгыы күүскэ үлэлиэҕиҥ, саҕалаабыт бары үлэлэри олоххо киллэриэҕиҥ диэн ыҥырабын!