Аммаҕа таас чох тиийбэтиттэн ититиини биэрии тохтуур кутталлаах диэн сымыйа сурах тарҕанна

Социальнай ситимнэринэн Амма улууһугар таас чох тиийбэккэ, ититиини биэрии кэмин үлэтэ харгыстанар кутталлааҕын туһунан сурах тарҕаммыта. Амма улууһун баһылыга Степан Кузьмин иһитиннэриини сымыйа сурах буоларын бигэргэттэ уонна билигин бары хочуолунайдар былаан быһыытынан үлэлииллэрин биллэрдэ.

Баһылык быһаарарынан, дьон мунаахсыйыытын улуус дьаһалтата таһаарбыт бирикээһэ үөскэппит.

«“Үрдүк бэлэмнээх буолуу” эрэсиимэтин киллэрэр туһунан дьаһал тахсыбыта кырдьык, ол эрээри бу хас сыл аайы — күһүн, кыһын, саас, сайын ыытыллар үлэ. Эбийиэктэр тоҥмотуннар диэн хайаан да хонтуруол наада, бары тэрилтэлэр бэлэм буолуохтаахтар. Судургутук эттэххэ, ити сэрэтэр үлэ. Социальнай ситимнэртэн дьон “ЧС эрэсиимэ” диэн сыыһа өйдөөбүттэр. Оттон биһиги дьаһалбытыгар үрдүк бэлэмнээх буолуу эрэ туһунан этиллэр. Билигин Амма улууһугар ититэр эбийиэктэр былаан быһыытынан үлэлии тураллар», — диэн быһаарда Степан Кузьмин.

Таас чох саппааһа баар дуо?

Улуус баһылыга  бэлиэтээбитинэн, хочуолунайдарга чох саппааһа сэтинньи ый ортотугар диэри баар. Бу боппуруос Саха сирин Бырабыыталыстыбатын уонна ОДьКХ  министиэристибэтин кытаанах хонтуруолугар турар. «Балаһыанньаны кэтээн көрөбүт, чох тиэллэн кэлэрин күүтэбит», — диэн эбэн эттэ Кузьмин.