Дьокуускайга бииргэ арыгылаан баран, ыалдьыта харчытын, көмүһүн уорбут

Дьокуускайга командировкаҕа кэлэн үлэлии сылдьар Иркутскай уобалаһын олохтооҕуттан биир мөлүйүөн солк. тахса суумалаах харчытын уонна көмүс киэргэллэрин уорбут киһи тутулунна. Уоруйах саҥа билсибит киһитин кытта бииргэ арыгылаан баран, утуйбутун туһаммыт.

ИДьМ «Дьокуускайдааҕы» управлениетын 4 №-дээх полиция салаатын дьуһуурунай чааһыгар Иркутскайтан кэлбит эр киһи сайабылыанньа түһэрбит. Кини гостиницаҕа куортамнаан олорор хоһуттан харчыта уонна сыаналаах ювелирнай киэргэллэрэ сүппүттэрин тыллаабыт. Уопсай хоромньу 1 мөлүйүөн солк. тахса буолбут.

Холуобунай ирдэбил үлэһиттэрэ быһылаан хайдах буолбутун быһаардылар. Баахтанан үлэлиир эр киһи маҕаһыыҥҥа тахсан, биир куорат киһитин кытта билсибит уонна ыалдьыттата, көрсүһүүнү бэлиэтээри гостиницатыгар илдьэ барбыт. Ол олорон, арыгы иһэн баран, эр киһи сылайан уонна итирэн утуйан хаалбыт. Онтон ыалдьыта киниттэн 12 тыһыынча солк., илиигэ кэтэр чаһытын уонна кириэстээх кыһыл көмүс сыабын ылан күрээбит.

Полициялар көрдүүр тэрээһиннэри ыытан,  уорууга уорбаланааччыны булан туттулар. Урукку өттүгэр маннык уорууларга сууттана сылдьыбыт 43 саастаах Дьокуускай олохтооҕо буолара быһаарыллыбыт. Эр киһи билинэринэн, көмүс сыабы тута ломбардка илдьэн 350 тыһ. солк. туттарбыт, 95 тыһ.олк. ороскуоттаабыт. Оттон чаһыны уонна кириэһи бэйэтэ кэтээри хаалларбыт.

Билигин полиция үлэһиттэрэ уоруллубут маллары, ордубут харчыны уонна ломбардтан көмүс сыабы барытын хомуйан ыллылар. Дьыала силиэстийэтэ түмүктэннэҕинэ, маллар сокуоннай хаһаайыныгар төннөрүллүөхтэрэ.

Тутуллубут киһиэхэ РФ Холуобунай кодексатын 158 ыстатыйатын 4 чааһынан («Уоруу») холуобунай дьыала тэрилиннэ диэн ИДьМ пресс-сулууспата иһитиннэрэр.