«Профессионалитет» федеральнай бырайыагынан тыа хаһаайыстыбатын тиэхиньикумун дьиэлэригэр хапытаалынай өрөмүөн ыытыллар

«Профессионалитет» федеральнай бырайыак «Ыччат уонна оҕолор» национальнай бырайыак чэрчитинэн ыытыллар. Бу бырайыагынан Мэҥэ Хаҥалас улууһун Тумул сэлиэнньэтигэр улахан өрөмүөн үлэтэ түмүктэннэ.

1970-1980-с сылларга тутуллубут Дьокуускайдааҕы тыа хаһаайыстыбатын тиэхиньикумун Тумуллааҕы салаатын 2-с нүөмэрдээх үөрэтэр куорпуһун уонна уопсай дьиэтин аан бастаан хапытаалынайдык өрөмүөннээтилэр.

Эбийиэктэргэ инфраструктура толору саҥардылынна: устудьуоннары аныгы үөрэнэр аудиториялар уонна тупсаҕай олорор хостор күүтэллэр.

Дьокуускайдааҕы тыа хаһаайыстыбатын тиэхиньикумун Тумуллааҕы салаатыгар бу иннинэ 1-кы нүөмэрдээх үөрэтэр куорпус уонна успуорт саалата саҥардыллыбыттара.