Маркетплейстан атыылаһыллыбыт быһах холуобунай дьыалаҕа тиэрдиэн сөп

Бүгүн биһиги дьон-сэргэ ортотугар киэҥник тарҕаммыт, ол эрээри үгүс атыылаһааччылар соччо билбэт, сэрэйбэт кыһалҕаларын туһунан суруйабыт.

Холобур, интэриниэт-маҕаһыыҥҥа (маркетплейска) уонна булка эбэтэр айылҕаҕа сылдьарга аналлаах, көрүөххэ бэртээхэй быһаҕы сакаастан ылаҕыт. Табаар быһаарыытыгар суруллар: «Сэп-сэбиргэл көрүҥэр киирбэт». Ити кэннэ эһиги холкутук сакаастаан, баһыылкаҕытын тутаҕыт, оттон биир ыйынан доҕоргутугар төрөөбүт күнүгэр соһутан бэлэх уунаҕыт.

Ылан көрдөххө, ити олох боростуой күннээҕи түбэлтэ. Ол эрээри, Арассыыйа сокуонунан, маннык дьайыы буруйу оҥоруунан ааҕыллар, оттон саамай куһаҕаныгар — холуобунай дьыалаҕа тиэрдэр. Сокуону билбэт буолууттан полиция «туһаҕар» хайдах киирэн биэрбэт туһунан сиһилии ырытыаҕыҥ.

Кыһалҕа төрүөтэ тугуй?

Билигин маркетплейстар булчут  быһахтарынан туолан тураллар (биитин уһуна 90 мм уһун, кэтитэ 2,4 мм халыҥ, ыстаалын кытаанаҕа 25 HRC үрдүк, тарбахха кэтиллэр тутаахтаах). Ол эрээри, атыылааччылар табаардарыгар сымыйа сертификационнай киинтэн  «быһаарар суругу» сыһыараллар. Онно быһах «дьиэҕэ-уокка туттуллар тэрил» диэн ыйыллар буолар. Үксүгэр маннык докумуоннар сымыйа буолаллар, эбэтэр харчы эрэ туһугар үлэлиир дьиҥэ суох «лабораториялар» сымыйа түмүктэрэ сыһыарыллаллар.

Сокуон тугу этэрий?

Саамай сүрүнүн өйдөөҥ: полиция үлэһиттэрэ быһаҕы тутан ылан криминалистическай эспэртииһэ оҥороллоругар маркетплейс саайтыттан бэчээттэммит кумааҕыга буолбакка, быһах дьиҥнээх тас көрүҥүн, кээмэйин  көрөллөр. Өскөтүн быһах «тымныы сэп-сэбиргэл» диэн быһаарылыннаҕына, атыылааччы сымыйа «кумааҕыта» эһигини эппиэтинэстэн быыһаабат.

«Сэп-сэбиргэл туһунан» федеральнай сокуоҥҥа олоҕуран, булчут сэбин-сэбиргэлин булчут билиэттээх эбэтэр булт саатын тута сылдьар уонна харайар көҥүллээх эрэ дьон атыылаһар бырааптаахтар.

Өскөтүн оннук докумуон суох буоллаҕына, эһиги сокуону кэһэҕит. Бу КоАП РФ 20.8 ыстатыйатын 6-с чааһынан административнай эппиэтинэскэ тиэрдэр — 3 000-тан 5 000 солк. тиийэ ыстараап уонна быһаҕы былдьааһын. Оттон маннык быһаҕы атын киһиэ бэлэхтээһин эбэтэр атыылааһын холуобунай дьыалаҕа тиэрдиэн сөп диэн Охотники.ру саайт быһаарар.

Маннык быраабылалары тутуһуҥ:

1. Маркетплейс суруйбутугар итэҕэйимэҥ. Өскөтүн быһах сэп-сэбиргэлгэ маарынныыр, уһун биилээх буоллаҕына, сыһыарыллыбыт PDF-докумуонтан тутулуга суох, сэрэхтээхтик сыһыаннаһыҥ.
2. Анал маҕаһыыннартан атыылаһыҥ. Бэйэлэрин ааттарын харыстыыр булт маҕаһыыннара дьиҥнээх, чэпчэкитик бэрэбиэркэлэнэр сэртипикээттэри биэрэллэр.
3. Докумуоҥҥутун илдьэ сылдьыҥ. Өскөтүн эһиги  сэп-сэбиргэл сокуоннай хаһаайына буоларгытын туоһулуур докумуоннаах (булчут билиэтэ эбэтэр РОХа) буоллаххытына, айылҕаҕа тахсаргар мэлдьи илдьэ сылдьыҥ. Бу полиция өттүттэн үөскүүр боппуруостары 99% быһаарар.
4. Быһаҕы «мээнэ» бэлэхтээмэҥ. Быһаҕы бэлэхтиэххитин баҕарар буоллаххытына, ол киһи маннык сэби атыылаһар уонна харайар сокуоннай бырааптааҕын эрдэттэн чуолкайдааҥ. Саамай сөптөөҕө — биитин уһуна 90 мм-тэн кылгас, гардата суох бүк тутуллубат быһахтары эрэ бэлэхтээн.