Аммалар уолларын Борис Сдвижкову чиэстээтилэр

Бүгүн Амма улууһун ааттыттан быйылгы «Дыгын оонньууларыгар» кыттан иккис буолбут Борис Сдвижкову дойтутун дьоно-сэргэтэ чиэстээтилэр. Кини Амма улууһун Чапчылҕан нэһилиэгиттэн төрүттээх.

Санатар буоллахха, Туймаада ыһыаҕар Саха сирин 12 күүстээх боотура икки күн успуорт сэттэ көрүҥэр: ыстаҥаҕа, тутум эргииргэ, мас тардыһыытыгар, оҕунан ытыыга, хапсаҕайга, 400 м сүүрүүгэ, тааһы көтөҕүүгэ уонна хаамыыга күрэхтэспиттэрэ. Икки күннээх күрэхтэһии түмүгүнэн Борис Сдвижков 32 баалы ылан, «Тайга» пилорама сэртипикээтин хаһаайынынан буолбута.

Амма улууһун баһылыга Степан Кузьмин кини сыралаах үлэтин-хамнаһын, успуорка бэриниитин уонна Амма улууһун чаҕылхайдык көмүскээбитин, дьоһун көрдөрүүтүн иһин дириҥ махталын биллэрдэ. Улуус баһылыга махталын уонна ытыктабылын бэлиэтигэр «Амма киэн туттуута» түөскэ кэтиллэр бэлиэни уонна 100 000 солк. суумалаах сэртипикээти туттарда. Ону сэргэ Чаппылҕан нэһилиэгин баһылыга Бориска махталын биллэрдэ, киниэхэ 80 000 солк. суумалаах сэртипикээти туттарда.

Бу көрсүһүү биһиги улууспутугар биир сомоҕолоһуу, түмсүү уонна өйөбүл чаҕылхай бэлиэтинэн буолла, хас биирдии киһи талаана, өйөнүллэрэ улахан суолталаах диэн Амма улууһун дьаһалтатын пресс-сулууспата иһитиннэрэр.