«Анимур» анимационнай киинэ бэстибээлигэр сайаапканы тутууну уһаттылар

Муус устар 15 күнүттэн «Анимур» диэн норуоттар икки ардыларынааҕы  анимационнай киинэ бэстибээлигэр сайаапканы тутууну балаҕан ыйын 10 күнүгэр уһаттылар. Тэрээһин Хабаровскай куоракка балаҕан ыйын 18 күнүттэн алтынньы ый 1 күнүгэр диэри ааһыаҕа. 

Куонкуруска 2021 сылтан 2023 сылга диэри Арассыыйаҕа, Азия-Чуумпу акыйаан эрэгийиэҥҥэ уонна Соҕуруу-Илин Азияҕа уһуллубут кылгас анимационнай киинэлэр, сериаллар кытталлар.

Атын тас дойдулартан киирбит үлэлэри куонкуруһу таһынан ыытыллар бэстибээл бырагырааматыгар көрдөрүөхтэрэ. Манна толору кээмэйдээх уонна кылгас анимационнай киинэлэр кыттыыны ылаллар.

Бэстибээл түмүгүнэн кыайыылаахтары барыта аҕыс номинациянан наҕараадалыахтара.

Куонкуруска сайаапканы «Анимур» бэстибээл саайтыгар эбэтэр Film Freeway уонна Festhome онлайн-платформаларга бэс ыйын 15 күнүгэр диэри туталлар.

Тэрээһин бастакы ыытыллыбыт сылыгар араас дойдулартан 1200-тэн тахса үлэ киирбитэ. Көрөөччүлэргэ Арассыыйатааҕы 35, Азиятааҕы 13 уонна атын дойдулар 48 киинэлэрин аан бастакытын көрдөрбүттэрэ.