Баһаарынай-быыһыыр успуорт чөмпүйэнээтэ саҕаланна

Бүгүн, кулун тутар 26 күнүгэр, Ыксаллаах быһыы-майгы министиэристибэтин Саха сиринээҕи управлениетын үөрэтэр-эрчийэр полигонун баазатыгар баһаарынай-быыһыыр успуорт чөмпүйэнээтэ саҕаланна.

Бастакы күн кыттааччылар мэһэйдэрдээх 100 миэтэрэ уһуннаах балаһаны туорааһыҥҥа күрэхтэстилэр. Иккис күн кинилэр өссө икки көрүҥҥэ бастыҥнар ааттарын иһин охсуһуохтара: үөрэнэр башняҕа штурмовой кирилиэһинэн тахсыы (2 этээс – дьахталлар, 4 этээс – эр дьон) уонна баһаарынай эстафета.

«Күрэхтэһиигэ Дьокуускай куораттан уонна атын да оройуоннартан аҕыс хамаанданан 64 киһи кытынна. Күрэхтэһии түмүгүнэн биһиги норуоттар икки ардыларынааҕы уонна Бүтүн Арассыыйатааҕы күрэхтэһиилэргэ кыттарга Саха Өрөспүүбүлүкэтин сүүмэрдэммит хамаандатын тэрийэргэ күүстээх спортсменнары быһаарыахпыт», – диэн Арассыыйа ЫБММ Саха сиринээҕи салаатын успуорка бэлэмниир уонна баһаарынай-прикладной отделениетын начаалынньыга Григорий Захаров кэпсиир.