Бээрийэлэр бырабыыталыстыба отчуотун иһиттилэр

Уус Алдан улууһун Бээрийэ нэһилиэгэр СӨ Бырабыыталыстыбатын отчуотун 40 киһи кэлэн иһиттэ. Олохтоохтору долгутар боппуруостарынан оскуоланы уонна уһуйааны тутуу, суол-иис кыһалҕата буолар диэн yakutia-daily.ru саайт суруйар.

Оскуола тутуутун олохтоохтор өссө ааспыт сылтан туруорсаллар. Бээрийэҕэ 180-ча киһи олорор. Уһуйааҥҥа 18 оҕо сылдьар, оттон оскуолаҕа 33 оҕо үөрэнэр. Үөрэх уонна наука миниистирин солбуйааччы Иннокентий Афанасьев нэһилиэккэ оскуола-уһуйааны туттарарга, онуоха сайаапканы оройуоннааҕы үөрэх управлениетын нөҥүө ыытарга сүбэлээтэ.

Итиэннэ атын нэһилиэктэргэ курдук, Бээрийэҕэ педагог уонна миэдик тиийбэт эбит. Олохтоохтор маны киин сиртэн ыраах уонна уустук суоллаах-иистээх буолан диэн быһаараллар. Учуутал Татьяна Кривошапкина сайын суол алдьаннаҕына сылдьарга диэн вездеход тырааныспар бэриллэригэр көрдөстө. Онуоха тырааныспар министиэристибэтин бэрэстэбиитэлэ Тандаҕа, ол иһигэр Бээрийэҕэ диэри суол оҥоһуута өрөспүүбүлүкэтээҕи реестргэ киирбитин иһитиннэрдэ. Онон сотору үлэ саҕаланыаҕа.