Бүгүн сорох оройуоннарынан -30°С диэри тымныйар

Саха сирин үгүс оройуоннарынан синоптиктар бүгүн, сэтинньи 18 күнүгэр, күүстээх хаар түһэрин билгэлииллэр.

Хоту муора кытылынан, хотугулуу-илин, соҕуруу өттүгэр, ону кытта Халымаҕа күүстээх хаар түһэрэ сабаҕаланар. Халымаҕа сөкүүндэҕэ 9-14 м. түргэннээх күүстээх тыалырыа. Арктика улуустарынан, соҕуруу, соҕуруулуу-арҕаа түүҥҥү өттүгэр  сорох кэмигэр сөкүүндэҕэ 15-20 м. түргэннээх күүстээх тыал, ардыгар буурҕа түһэрэ күүтүллэр.

Салгын температурата түүн -10-15°С кыраадыс тымныы, былыта суох буоллаҕына -15-20°С, хотугулуу-арҕаа -20-25°С кыраадыска диэри тымныйар, хотугулуу-илин улуустарга -25-30°С, соҕуруу хаар түстэҕинэ, Халыма-Индигиир оройуоннарыгар -5-10°С кыраадыс тымныйар. Күнүс салгын температурата -5-10°С, хоту -10-15°С, Халымаҕа, соҕуруулуу-арҕаа -2-7°С кыраадыс тымныы.

Дьокуускайга салгын температурата түүн -6…-11°С кыраадыс тымныы, күнүс -6…-8°С кыраадыска диэри тымныйар. Сөҥүүтэ суох, сөкүүндэҕэ 8-9 м. түргэннээх тыаллаах.