«Donatsu Drift Fest» бэстибээлгэ Саха сирин бастыҥ дрифтердара ааттаннылар

Ааспыт өрөбүлгэ, атырдьах ыйын 25 күнүгэр, Үс Хатыҥҥа «Donatsu Drift Fest» бэстибээлин сайыҥҥы дрифкэ күрэхтэһии буолан ааста. Бу туһунан СӨ Физическэй култуураҕа уонна маассабай успуорка управлениетыгар иһитиннэрдилэр.

Бастакы миэстэҕэ Киренскай Иннокентий тигистэ, иккис миэстэҕэ — Смарыгин Дмитрий, үһүскэ — Черноградскай Леонид таҕыстылар. Кыайыылаахха «Альфа-банк» хампаанньа 50 тыһыынча солкуобайы, ону таһынан спонсордартан харчынан сэртипикээти ылла. Призердар эмиэ харчынан сэртипикээттэринэн уонна сыаналаах бириистэринэн наҕараадаланнылар.

Квалификация кыайыылааҕа Киренскай Иннокентий Up Garage түмсүүттэн эбии 20 тыһыынча солкуобайдаах уонна Interier Mebel хампаанньаттан 3 тыһыынча солкуобайдаах сэртипикээттэринэн наҕараадаланныллар. Хамаанданан зачекка «IUM» бөлөх бастаата.

Күрэхтэһии тэрийээччилэрэ СӨ Физическэй култуураҕа уонна успуорка министиэристибэтигэр, СӨ физическэй култуураҕа уонна маассабай успуорка управлениетыгар, ону тэҥэ турнир спонсордарыгар — «Альфа-Банк», «Interier Mebel», «Одун тур», «Автолавка», «PROтело», «Молочный дождик», «GenTools», «АвтоBest» уонн «Шеф Андре» хампаанньаларга махталларын тиэртилэр.