Дьоруой Дмитрий Егоров малларын дойдутугар аҕаллылар

Кулун тутар 12 күнүгэр Сунтаар улууһун Арыылаах нэһилиэгин Л.А. Попов аатынан орто оскуолатыгар Арассыыйа уонна уонна ДНӨ Дьоруойа Дмитрий Егоров олоҕун бүтэһик күннэригэр диэри кэтэ сылдьыбыт бронежилетын, «Сунтаар» диэн позывной суруктаах кааскатын, Санкт Петербург худуоһунньуга Виктор Чернов уруһуйдаабыт мэтириэтин Дьокуускай куораттан «Арассыыйа — мин историям» историческай түмэлтэн быыстапкаҕа дьон көрүүтүгэр аҕаллылар.

— Экспонаттары С.Зверев аатынан холбоһуктаах түмэл салайааччыта Альбина Алексеевна Федорова, пуонда сүрүн харайааччыта Эмма Васильевна Васильева туттардылар. Нэһилиэкпит баһылыга Иван Игнатьев, Дмитрий бииргэ үөрэммит уолаттара, оҕо уһуйаанын үлэһиттэрэ, иитиллээччилэрэ кыттыыны ыллылар. «Сулусчаан» уһуйаан иитиллээччитэ Кирилл Никифоров Герой туһунан сүрдээх үчүгэйдик кэпсээбитин бары сэҥээрэн иһиттибит, — диэн оскуола дириэктэрэ Лидия Никитина кэпсээтэ.

Быыстапка биир нэдиэлэ устата туруоҕа. Биир дойдулаахтара, чугастыы олорор Маар Күөл, Дьаархан олохтоохторо, үөрэнээччилэрэ кэлэн көрүөхтэрэ. Салгыы экспонаттар Сиэйэ нэһилиэгэр айанныахтара.

Арыылаах нэһилиэгин Уһун Күөл бөһүөлэгэ -Дьоруой Дмитрий Егоров төрөөбүт, улааппыт сирэ-дойдута буолар.