Эдуард Платонов: «Анаабыр улууһа үүнэр-сайдар»

Бүгүн, ахсынньы 21 күнүгэр, СӨ Бырабыыталыстыбатын бэрэссэдээтэлэ Кирилл Бычков Олохтоох бэйэни салайыныы сэбиэтин түмүктүүр мунньаҕын ыытта. Тэрээһиҥҥэ улуустар уонна куораттар баһылыктара кыттыыны ыллылар.

Анаабыр улууһун баһылыга Эдуард Платонов бу тула санаатын үллэһиннэ:

— Сылы түмүктүүр мунньах уонна улууһум туһунан этэр буоллахха, Арктическай оройуоннары кытта тэҥҥэ биһиги улууспут сайдан иһэр. Быйыл биһиэхэ түргэн интэриниэт ситимэ киирдэ. Онон быйыл улууспутун барытын хабар цифровой ситим холбонно. Бу олох-дьаһах хаачыстыбата тупсарыгар улахан суолталаах. Маны таһынан, биһиэхэ аҕыс кыбартыыралаах таас дьиэ Үрүҥ Хайаҕа тутуллан киирдэ. Тыа хаһаайыстыбатыгар эмиэ кэккэ ситиһиилэрдээхпит. Табабыт ахсаана элбиир. Сөптөөх хайысханан үлэлээн эрэбит. Оройуоммутугар уһуйааччы сылын түмүктээбиппит. Тустаах дьону наҕараадалаабыппыт.