Хапсаҕайга аан дойду бастакы чөмпүйэнээтин түмүгэ таҕыста

Балаҕан ыйын 5 күнүгэр киин куоракка Кыргызстаҥҥа атырдьах ыйын 24-25 күннэригэр буолбут хапсаҕайга аан дойду бастакы чөмпүйэнээтин түмүгүн  таһаардылар. Бу туһунан СӨ Ил Дарханын уонна Бырабыыталыстыбатын пресс-сулууспатыгар иһитиннэрдилэр.

Өрөспүүбүлүкэ салалтатын аатыттан чөмпүйэнээ кыайыылаахтарын уонна призердарын Саха сирин бырабыыталыстыбатын бэрэссэдээтэлин солбуйааччы Сергей Местников эҕэрдэлээтэ. Кини тэрийээччилэргэ уонна Кыргызстан салалтатыгар хапсаҕайга бастакы чөмпүйэнээтэ үрдүк таһымнаахтык ыытыллыбытынан махтанна.

«Чөмпүйэнээ үрдүк тэрээһиннээхтик ааста. Күүстээхтэр ааттарын быһаарыыга аан дойду үгүс дойдуларыттан күүстээх  спортсменнара кииристилэр. Биһиги национальнай успуорпут көрүҥэ аан дойду аренатыгар тахсан сайдар буолла. Саха хапсаҕайдьыттара алта ыйааһыҥҥа бастакы миэстэни ылбыттара. Уһулуччулаах уонна чаҕылхай киирсиилэрин иһин махтанабын», — диэн Сергей Местников эттэ.

Хапсаҕайга аан дойдутааҕы Федерациятын Бэрэсидьиэнэ Вячеслав Нестеров иһитиннэриитинэн, аан дойду аныгыс чөмпүйэнээтэ 2026 сылга Дьокуускай куоракка ыытыллыаҕа.

Санатан эттэххэ, Бишкек куоракка аан дойду чөмпүйэнээтин түмүгүнэн саха тустууктара алта кыһыл, алта үрүҥ көмүс уонна үс боруонса мэтээл хаһаайыннарынан буоллулар. Күрэхтэһиигэ аан дойду 18 дойдуларыттан 90-тан тахса спортсмен кытынна.