«ҺӨҔҮҤ: саха тыла худуоһунньук хараҕынан 2.0» күрэх биллэрилиннэ

Саха сиринээҕи худуоһунньуктар Сойуустара, СӨ Национальнай бибилэтиэкэ, «Саха сирин култуурата» айар-бөлөх «ҺӨҔҮҤ: саха тыла худуоһунньук хараҕынан 2.0» II өрөспүүбүлүкэтээҕи сүүмэрдиир түһүмэх күрэҕин биллэрдэ.

Күрэххэ идэтийбит худуоһунньуктарын уонна үрдүк үөрэх кыһаларын устудьуоннарын кытталларыгар ыҥыраллар. Сайаапкалары ыам ыйын 15 күнүгэр диэри galereya_ykt@mail.ru электроннай буочтаҕа туталлар.

Бырайыакка худуоһунньук төрөөбүт сахатын тылын хайдах бэйэтэ ылынарынан уонна өйдүүрүнэн ырытарыгар, билиҥҥи кэмҥэ суолтатын, туттуллуутун, тутулун, саҥарыллыытын, тылын баайын, уратытын, онтон да атын сэҥээрдэр тиэмэлэри сыныйан-сылыктаан анаарарыгар, дириҥник хорутан толкуйдуулларыгар ыҥыраллар.

Биирдиилээн биитэр бөлөҕүнэн кыттар ааптардар ойуулуур-дьүһүннүүр ускуустуба араас көрүҥнэрин (живопись, графика, скульптура, декоративно-прикладное искусство, инсталляция) туһанан, көҥүл этэр кыахтаахтар. Ол идиэйэлэрин олоххо киллэрэллэригэр 8000 солк. суума харчы туттар матырыйаалларыгар анаан атыылаһалларыгар бэриллэр.

Сайаапкалары ыам ыйын 15 күнүгэр диэри туталлар. Балаһыанньатын сиһилии бу сигэнэн киирэн ааҕыҥ.