Ил Дархан Кыайыы 80 сылыгар бэлэмнэнии боппуруостарын көрдө

Ил Дархан  Айсен Николаев «Кыайыы» өрөспүүбүлүкэтээҕи тэрийэр кэмитиэт сүбэ мунньаҕын ыытта.  Ил Дархан Кыайыы 80 сылыгар бэлэмнэнии тула боппуруостары көрдө.

«Өрөспүүбүлүкэ уонна дойду үрдүнэн бу дьоһун бэлиэ датаны бэлиэтииргэ сүҥкэн үлэ ыытыллар.   Аҕа дойду сэриитин бэтэрээннэригэр анаммыт социальнай өйөбүлгэ уонна мэдиссиинэ өттүнэн хааччыйыыга, кыайыыны уһансыбыт ытык дьоммутун үйэтитиигэ, эдэр ыччаты патриотическай иитиигэ 2022 сылтан тэрээһиннэр былаан быһыытынан олоххо киллэриллэллэр.   Бу үлэ билигин фашизмы утары охсуһуу кэмигэр суолтата өссө үрдээн турар.  Эдэр  көлүөнэ Кыайыы дьиҥ суолтатын өйдүөн наада», –  диэн Айсен Николаев  бэлиэтээн эттэ.

Сүбэ мунньахха Үлэ министиэристибэтэ   Кыайыы 80 сылыгар бэлэмнэниини уонна бырааһынньыгы ыытыы былаанын туһунан  иһитиннэрии оҥордо.

Үгэс быһыытынан, Кыайыы күнүгэр Аҕа дойду Улуу сэриитин бэтэрээннэригэр биир кэмнээх төлөбүр оҥоһуллуоҕа.  2024 сылтан Ил Дархан сорудаҕынан сэрии оҕолоругар эмиэ биир кэмнээх төлөбүр олохтоммута.

Айсен Николаев Кыайыы 80 сылынан Аҕа дойду сэриитин бэтэрээннэригэр уонна сэрии оҕолоругар үбүлүөйүнэй бэлиэлэри олохтуур туһунан Бэтэрээннэр өрөспүүбүлүкэтээҕи сэбиэттэрин этиитин өйөөтө. Маны таһынан Бэтэрээннэр өрөспүүбүлүкэтээҕи сэбиэттэрин этиилэринэн, Ил Дархан  СӨ Бырабыыталыстыбатыгар Дьокуускай куоракка  ытык кырдьаҕастарга Көхтөөх  уһун үйэлэнии киинин арыйыы боппуруоһунан үлэ ыытарга сорудахтаата.