Москваҕа саахсаланыан баҕарар паараны көрдүүллэр

ЗАГС управлениета Москваҕа буолар норуоттар икки ардыларынааҕы быыстапка-пуорум кэмигэр саахсаланыан баҕарар паараны көрдүүр. Быыстапка сэтинньи 4 күнүттэн 2024 сыл муус устар 12 күнүгэр диэри буолар. Манна дойду бары эрэгийиэннэрэ кытталлар. Оттон сахалыы уруу сиэрин-туомун, үгэстэрин көрдөрөр саахсаланыы сэтинньи 12 күнүгэр ВДНХ павильонугар буолуоҕа.

Бу манна 35 саастарын туола илик, Саха сиригэр бастайааннай олорор, аан бастаан саахсаланар паара кыттыан сөп. Кинилэр туох эрэ ситиһиилээх, эбэтэр, көхтөөхтүк уопсастыбаннай үлэнэн дьарыктанар, байыаннай дьайыыга кыттыбыт, киһи киэн туттар дьоно буолуохтаахтар.

Паараны талыы бастаан улуустарга, куораттарга ыытыллар, онтон биир паараны талан, ЗАГС управлениетыгар хадатаайыстыба түһэрэллэр. Күрэс түмүгүнэн, ЗАГС управлениета барыларыттан биир паараны талан ылар. Бу паара «Арассыыйа» норуотттар икки ардыларынааҕы быыстапка-пуорум кэмигэр үөрүүлээх быһыыга-майгыга саахсаланар. Манна сахалыы уруу сиэрин-тулумун көрдөрөллөр.

Кэргэн тахсар эдэрдэргэ уонна кинилэр төрөппүттэригэр Москваҕа диэри кэлэ-бара айаннарын төлөбүрүн, гостиницаҕа олороллорун, о.д.а. төлүүллэр.

Сайаапкалары балаҕан ыйын 15-25 күннэригэр туталлар.