Путин Кытай спортсменнарын «Азия оҕолоро» оонньууларга ыҥырда

Владимир Путин Кытайга сырыытын кэмигэр 2024 сылга Арассыыйаҕа былааннаммыт күрэхтэһиилэригэр, ол иһигэр «Азия оҕолоро» норуоттар икки ардыларынааҕы успуорт оонньууларыгар Кытай спорстменнарын күүтэллэрин туһунан эттэ.

«Сайыҥҥы «Азия оҕолоро», «Доҕордоһуу аан дойдутааҕы оонньуулара», «БРИКС» курдук улахан успуорт тэрээһиннэргэ КНӨ атлеттарын күүтэбит», — диэтэ дойду Бэрэсидьиэнэ. Бу туһунан ТАСС суруйар.

«Азия оҕолоро» норуоттар икки ардыларынааҕы оонньуулар Дьокуускайга бэс ыйын 25 күнүттэн от ыйын 7 күнүгэр диэри ыытыллыахтара. Бу оонньуулар быйыл дойдуга биир саамай улахан күрэхтэһиитинэн буолуоҕа. Араас дойдулартан 3,5 тыһыынча спортсмен кыттара күүтүллэр. Урут Владимир Путин «Азия оҕолоро» оҕо, ыччат успуордун эйгэтигэр биир саамай интэриэһинэй уонна ситиһиилээх бырайыагынан ааттаабыта.