Саха тыйаатырын артыыһа Михаил Семенов норуодунай артыыс буолла

П.А.Ойуунускай аатынан Саха академическай тыйаатырын артыыһыгар Михаил Егорович Семеновка Саха Өрөспүүбүлүкэтин норуодунай артыыһа бочуоттаах аат иҥэрилиннэ. Артыыс тыйаатырга 55 сыл үлэлээбит. Кини бу сайын 80 сааһын томточчу туолбута.

«Миэхэ бу соһуччу сонун буолла. Ил Дархаммытыгар, Ил Түмэҥҥэ, тыйаатырым кэлэктиибигэр уонна көрөөччүлэрбэр мин үлэбин үрдүктүк сыаналаабыттарыгар махтанабын. Мин бу идэни талбыппыттан уонна тыйаатырбар 55 сыл үлэлээбиппиттэн биирдэ даҕаны кэмсиммэтэҕим. Көрөөччүлэрбит испэктээккэ кэлэн иэйии ылан, астынан баралларыгар куруук баҕарабын», — диэн Михаил Егорович үөрүүтүн үллэстэр диэн СИА суруйар.

Михаил Семенов «Сахалар ааттарыттан», «Ийэ сир», «Дойду оҕото Ньукулай Дорогуунап», «Манчаары» уо.д.а. испэктээктэргэ оруоллардааҕынан биллэр. Маны таһынан кини «Кураан кэнниттэн ардах», «Река», «Кытыл» киинэлэргэ оонньообута.