Саха уолаттара — бастыҥ снайпердар

Дьокуускай куоракка «Сулус» үөрэтэр-ытар кииҥҥэ Аҕа дойдуну көмүскээччи күнүн чэрчитинэн иккис күнүн Сэбиэскэй Сойуус Дьоруойа Федор Матвеевич Охлопков кэриэһигэр ыытыллар ыраахтан ытыыга бүтүн Арассыыйатааҕы турнира үгүс киһини түмтэ.

Икки күн ыытыллар күрэхтэһиигэ дойду араас эрэгийиэннэриттэн 100-кэ киһи кытта сылдьар. Кинилэр икки күн устата квалификационнай, күнүскү, түүҥҥү ытыыга түһүмэхтэри аастылар. Бастакы күн икки түһүмэҕи ааспыт пааранан хамаандалар кииристилэр. Дойду ааттаах-сурахтаах снайпердара бастыыр иһин болҕомтолорун, сатабылларын ууран, кыраҕытык кыҥаан кииристилэр. Би7иги, биллэн турар, Сэбиэскэй Сойуус Дьоруойа Федор Матвеевич Охлопков албан аатын бигэргэтэр курдук, уолаттарбытыгар күүскэ «ыарыйдыбыт».

Быһаарыылаах үһүс ытыы биһиэхэ үөрүүнү-көтүүнү аҕалла, эмискэ «Ураа! Уруй-айхал, саха уолаттарыгар!» диэн хаһыы-ыһыы ньиргийэ түстэ. Биһиги уолаттарбыт дойду ааттаахтарын кэннилэригэр хаалларан, кыайыы өрөгөйүн биллилэр.

Турнир түмүгүнэн, үһүс миэстэни «День» түһүмэххэ «Добрай» уонна «Кедр» снайпердар пааралара ылла. Кинилэргэ 500 тыһыынча солк. сертификат туттарылынна.

Иккис миэстэҕэ снайпер Дмитрий Радченко уонна корректировщига Сергей Кириченко таҕыстылар. Кинилэргэ сабыс-саҥа «Сокол» вездеход күлүүһэ туттарылынна.

Оттон бастакы миэстэни Чурапчы чулуу уолаттара – снайпер Сергей Яковлев уонна корректировщик Василий Яковлев ыллылар. Кыайыылаахтарга пикап массыына күлүүһэ туттарылынна.

«Бу күннэргэ «Сулус» снайперадар полигоннарыгар ыраахха ытыыга икки күннээх турнир олус кэрэхсэбиллээхтик ааста. Арассыыйа үрдүнэн маннык бастыҥ полигон суох курдук. Полигон күнүстэри-түүннэри 4 км диэри ыраахха тохтобула суох үлэлииргэ анаммыт. Манна снайпердары эрчийэргэ, үрдүк профессиональнай ытааччылары бэлэмнииргэ уонна үрдүк таһымнаах күрэхтэһиилэри ыытарга улахан кыах баар буолла. Биһиги саныырбытынан, манна күрэхтэһиини эрэ ыытыы буолбакка, аатырбыт, үйэлэргэ ааттара ааттанар снайпердар үүнэн-сайдан тахсыбыт сирдэригэр турниры ыытыы ураты суолталаах», – диэтэ Юрий Трутнев.

«Саха сиригэр биһиги улуу снайпердарбытын ытыктыыбыт, чиэстиибит уонна кинилэр үтүө үгэстэрин салгыахтара. Бу полигоҥҥа ырааҕы ытыыга идэтийэн дьарыктанар дьон эрчиллиэхтэрэ: байыаннайдар уонна спортсмент-ытааччылар. Маннык полигон арыллыыта биһиги снайпердарбыт үгэстэрин салгыырга кыаҕы биэриэҕэ. Итиэннэ ыччаппытын патриотическай тыыҥҥа иитиигэ өссө күүскэ үлэлииргэ тирэх буолуоҕа», – диэн санаатын үллэһиннэ Ил Дархан Айсен Николаев.

«Бүтүн Арассыыйатааҕы ырааҕы ытыыга турнир сүрдээх тэтимнээхтик, тыҥааһыннаахтык, кэрэхсэбиллээхтик ааста. Бары ытааччылар, тэрийээччилэр, Саха сирин олохтоохторун аатыттан турнирга ыраахтан кэлэн кыттыбыт дьоҥҥо барыларыгар махтаныахпын баҕарабын. Дьиҥнээх снайпердар – олус кытаанах, эр санаалаах, тулхадыйбат майгылаах дьон. Снайпердар, тэрийээччилэр ааттарыттан биһиги Юрий Петрович Трутневка махталбытын тиэрдэбит: бу кини идеята – биһиги Сахабыт сиригэр маннык полигону туттарбытыгар», – диэтэ «Сулус» үөрэтэр-эрчийэр киинин салайааччыта, Арассыыйа Дьоруойа Александр Колесов.

Турнир түмүгүнэн бастыҥ көрдөрүүлээх снайпердарга анал бириистэр туттарылыннылар. «Интеллигент» диэн позывнойдаах кыттааччы «Техномеханика» хампаанньаттан бинтиэпкэ уонна «Навигатор» хампаанньаттан тепловизионнай сыал тутта. «Лис» диэн позывнойдаах кыттааччыга «Калашников» хампаанньа бөлөҕө сэп-сэбиргэл тэрилин уонна оборудование биэрдэ. Оттон «Кузнец» уонна «Шмель» диэн позывнойдаах ытааччылар «Навигатор» хампаанньаттан корректировщик трубатын бэлэх быһыытынан туттулар.

Турнир түмүгүн таһаарарыгар Юрий Трутнев: «Бүтэһик Кыайыы, тиһэх ытыы – бэркэ ытылынна. Көрүөххэ олус үчүгэй, икки тыһыынча миэтэрэҕэ бастакы миэстэ иһин бириис Саха сиригэр хаалла диэн астынным. Бу Аҕа дойду Улуу сэриитин снайпердарын үтүө үгэстэрэ салҕанарын, кыайыыга дьулуур хаалбытын этэр. Ол аата снайпердар ахсааннара элбиэҕэ, биһиги бары бииргэ кыахпыт үрдүөҕэ. Биһиги кэлэр турниры манна ыытар туһунан толкуйдуубут. Саха сирин баһылыга манна алтынньыга буоларын эттэ. Онон 2024 сыл алтынньытыгар иккис турниры ыытар санаа үөскээтэ. Өссө туох оҥоһуллуон сөптөөҕүн, кэлэр турнирга бойобуой снайпиҥҥа болҕомто ууран, глушителлээх ытыыны олохтуохха сөп диэн санааҕа кэллибит», – диэтэ Юрий Трутнев.