Сокуон ылыллыытын хайдах ситиһиэххэ?

Соторутааҕыта  Ямало-Ненецкэй автономнай уокурукка Арассыыйа табаһыттарын сойууһун бырабылыанньатын мунньаҕа ыытылынна.   Тэрээһин Тазовскай оройуоҥҥа буолбута түбэһиэхчэ буолбатах. Ол курдук, бу 17 тыһыынча киһи олорор оройуонугар 280,0 тыһ. табаны иитэллэр.

Табаһыттар национальнай сойуустарын чилиэннэрэ мунньахха кытыннылар.

Бу түһүлгэҕэ 2023 сылга Чукотка автономнай уокуругар Анадырьга ыытыллыбыт Арассыыйа Федерациятын Хоту дойду төрүт норуоттарын V сийиэһин түмүктэрин, Табаһыттар национальнай сойуустарын үлэлэрин былаанын, чилиэнискэй усунуоһу төлөөһүн, РФ табаны иитэр эрэгийиэннэригэр Бырабылыанньа чилиэннэрин куратор быһыытынан сыһыарыы уо.д.а. боппуруостары көрдүлэр.  Сүрүн болҕомто эрэгийиэннэргэ  таба хаһаайыстыбаларын сайдыытыгар көмөлөһүүгэ туһаайылынна. “Сокуон көҕүлээһиннэрэ уонна табаны иитии сайдыытын стратегията”ырытылынна.

Саха сириттэн СӨ Судаарыстыбаннай Мунньаҕын (Ил Түмэн) бэрэссэдээтэлин бастакы солбуйааччы Александр Жирков, СӨ Арктиканы сайыннарыыга уонна Хоту дойду норуоттарын дьыалаларыгар миниистири солбуйааччы  Михаил Погодаев, СӨ табаһыттарын салаатааҕы сойууһун бэрэссэдээтэлэ Альберт Колесов, Муома улууһун Улахан Чыыстай нэһилиэгин баһылыга, СӨ Табаһыттарын ассоциациятын Бочуоттаах бэрэсидьиэнэ Павел Мараказов, табаһыттартан “Омолой” общинаттан Александр Барабанскай, Усуйаанаттан Игорь Слепцов кытыннылар.

— Сүрүннээн Табаһыттар национальнай сойуустара ыҥырбыт дьоно кытыннылар. Мунньахха баар кыһалҕаларбытын иҥэн-тоҥон дьүүллэстибит. Ол курдук, табаны иитиигэ Тыва, Бурятия, Забайкальскай уокурук, Иркутскай уобалас курдуктарга балаһыанньа ыарахана бэлиэтэннэ. Оттон Саха сиригэр, Ямалга, Чукоткаҕа муниципальнай, ситэриилээх былаастар таба иитиитин салаатын өйүүллэрэ этилиннэ. Быһата, судаарыстыба өттүттэн өйөбүл баара көмөлөөх буолбут. Ону сэргэ Арассыыйаҕа таба иитиитин туһунан сокуон ылыллыытын хайдах ситиһиэххэ сөбүн дьүүллэстибит. Ол курдук, РФ Тыа хаһаайыстыбатын министиэристибэтигэр таба иитиитигэр анал структура баар буолуута ирдэниэхтээх. Ямаллар бырамыысыланнас  сайдыытыгар бу салаа көрсөр кыһалҕаларын хайдах быһаарбыттарын туһунан кэпсээтилэр. Мунньах кэмигэр сир боппуруоһугар үлэ ыараханнык ыытыллара этилиннэ. Табаны иитиигэ бөрө мэнээктээһинэ, бырамыысыланнас кимэн киириитэ, сорох эрэгийиэннэргэ каадыр (табаһыт) боппуруоһа ыараханын аҕыннылар. Онон сокуон ылыллыытыгар ыытыллар үлэни бөлөхтөрүнэн хайдыһан, бэлэмниэххэ диэн сүбэлэстибит, — диэтэ Павел Маркович Мараказов.

Хаартыскалары: П.Мараказов, И.Баланов тиксэрдилэр.