Төрөөбүт тыллары сайыннарар бырайыактары билиһиннэрдилэр

А.Е. Кулаковскай-Өксөкүлээх Өлөксөй аатынан норуоттар доҕордоһууларын дьиэтигэр “СӨ судаарыстыбаннай уонна официальнай тылларын чөл хаалларыы, сайыннарыы” бырагыраама иитинэн олоххо киирбит бырайыактары билиһиннэрии буолан ааста. Санатан эттэххэ, өрөспүүбүлүкэҕэ судаарыстыбаннай уонна официальнай тыллар суолталарын учуоттаан, Ил Дархан Айсен Николаев быһаарыытынан, тустаах бырагыраамаҕа быйылгыттан 100 мөл. солк. көрүллэр.

Эрэгийиэннээҕи судаарыстыбаннай бырагыраама олоххо киириитигэр биэс толорооччу сыһыарыллыбыта: Үөрэх уонна билим, Култуура уонна духуобунай сайдыы, Ыччат дьыалаларын уонна социальнай коммуникациялар, Инновация уонна сыыппара технологияларын сайдыытын, Арктика сайдыытын уонна хотугу норуоттар дьыалаларын министиэристибэлэрэ.

“2021 сыллаахха бырагыраама  50 мөл. солк. суумалаах биир эрэ бырайыактаах үлэлээбитэ, 2022 сылга – 32 бырайыак, билигин номнуо 100 мөл. солк. суумалаах 52 бырайыак. Сайдыы хамсааһыныттан Ил Дархан, өрөспүүбүлүкэ Бырабыыталыстыбата төрөөбүт тыллары чөл хаалларыыга болҕомтото көстөр. Болҕомто салгыы уурулларыгар, өйөнөрүгэр эрэнэбит.

Быраактыка көрдөрөрүнэн, бырайыагы сүрүннээччиттэн, сүрүн толороочуттан улахан тутулуктаах. Өскөтүн эппиэттээх министиэристибэ бырагыраамаҕа эппиэтинэстээхтик сыһыаннаспат түгэнигэр, көдьүүһэ суох буолар”, — диэн Сергей Местников эттэ. Итиэннэ тыл, литэрэтиирэ уонна култуура нэһилиэстибэтин сыыппараҕа киллэриигэ уонна чөл хаалларыыга туһаайыллыбыт бырайыактар “Төрөөбүт тыл – норуот баайа” куонкуруһун лауреаттарыгар сэртипикээттэри туттарда.

Өрөспүүбүлүкэтээҕи куонкурус кыайыылаахтарынан буоллулар:

— “Бастыҥ мультимедийнэй бырайыак” номинацияҕа Чурапчы улууһун култууратын управлениетын “Чуораайытта заряжающий поколений светом” уонна Сунтаар улууһун Оҕо айымньытын киинин “Создание обучающей, обобщающей игры «ТОБУЛ” бырайыактар;

— “Төрөөбүт тыл бастыҥ эйгэтэ” номинацияҕа “Сахабэчээт”, Улус.Медиа таһаарыы “Тылы сөпкө туттуоҕуҥ” бырайыактара;

— “Нэһилиэк литэрэтиирэҕэ нэһилиэстибэтин туһунан бастыҥ бырайыак” номинацияҕа Амма 1-кы нүөмэрдээх оскуолатын “Ю.П. Борисов олоҥхотунан Баһырҕастаах аттаах Баабый Баатыр” музыкальнай-хореографическай испэктээгэ”, Чурапчы улууһун Болтоҥо нэһилиэгин норуот айар дьиэтин “Лингва: народная молва” бырайыактар;

—  “Өрөспүүбүлүкэ норуоттарын тылларын чөл хаалларыыга уонна сайыннарыыга оҕолорго уонна ыччакка бастыҥ бырайыак” номинацияҕа Мэҥэ Хаҥалас улууһун Тиэлиги сэлиэнньэтин норуот айымньытын дьиэтин “Төрөөбүт тылбынан көрөбүн” бырайыага.

СӨ Ил Дарханын уонна Бырабыыталыстыбатын дьаһалтатыгар тыллары сайыннарыы боппуруостарын сүрүннүүр управление салайааччыта Римма Жиркова бары түмсэн төрөөбүт тыллар сайдыыларыгар сүдү үлэни оҥордубут диэн бэлиэтээтэ уонна управление аатыттан махтал суруктары туттарда. “Бу бырагыраамаҕа үлэлэһиэхтээх Култуура уонна духуобунай сайдыы министиэристибэтигэр күүс-көмө буолан, эһиил баччаҕа 100 мөлүйүөннээх бырагыраамабытын олоххо киллэриэҕиҥ” — диэн эттэ.

Барыта 22 бырайыагы билиһиннэрдилэр, туох үлэ ыытыллыбытын кэпсээтилэр. Ол курдук, РНА СС Гуманитарнай чинчийии уонна хотугу аҕыйах ахсааннаах омуктар проблемаларын института, “Саха” НКИХ, “Тундра” ХЭУо, “Мультидитек” ХЭУо, “Терра” (Земля) этнокультурнай киин, А.Е. Кулаковскай аатынан норуоттар доҕордоһууларын дьиэтэ, СӨ Ил Дарханыгар Инновационнай менеджмент үрдүкү оскуолата, “Сахабэчээт”, Н.Е. Мординов – Амма Аччыгыйа аатынан “Кэскил” оҕо кыһата, “Полигониум” ХЭУо, “ИТ Польза” ХЭУо, М.К. Аммосов аатынан ХИФУ Юнеско хаапыдырата, СӨ Национальнай бибилэтиэкэтэ, Олоҥхо тыйаатыра, П.А. Ойуунускай аатынан саха академическай тыйаатыра, С.Н. Донской-2 аатынан Үөрэҕи сайыннарар уонна идэ таһымын үрдэтэр институт.

Бырагыраама көмөтүнэн төрөөбүт тыллары чинчийии, тыллары үөрэтии, порталлары үлэлэтии,  оҕо ойуулуктарын, оонньууларын, роликтары оҥоруу, куурустары ыытыы, уо.д.а. бырайыактар бааллар. Бу барыта төрөөбүт тыллары сайыннарар, оҕону, ыччаты сыһыарар соруктаахтар.

“Сахамедиа” холдинг генеральнай дириэктэрин солбуйааччы Чокуур Гаврильев “Көрдөө” бырайыагы билиһиннэрдэ. “Бу бырайыак сахалыы тыллаах контены барытын түмэр. Саайтарга тахсыбыт сонуннар бары манна көстөллөр, холобур, Сахамедиа, Улусмедиа.ру, Кыым. Дьон ирдэнэр матырыйаалларын көрдөөн булан ылар”, — диэн кэпсээтэ. Ол эбэтэр хас даҕаны саайты хасыһа барбакка, бу биир Көрдөө.ру киирэн, ханнык тиэмэҕэ сонун, ыстатыйа көрдүүллэрин суруйан булан ылар кыахтаахтар. Ону таһынан, сахалыы тыллаах тиһэх сонуннар быһалыы тахса тураллар, видеоконтент, аралдьытар, үөрэтэр ис хоһоонноох сканворд, тылбаасчыт, тылдьыт сигэлэрэ бааллар. Салгыы мобильнай сыһыарыы оҥоруохтарын баҕаралларын эттэ.

Туох да диэбит иһин, өрөспүүбүлүкэҕэ төрөөбүт тыллары сайыннарыыга кэлин салалта чахчы  болҕомтотун уурар буолла. Аныгы ыччат олус киэҥ өйүктээх. Ону олоххо киллэрэригэр “СӨ судаарыстыбаннай уонна официальнай тылларын чөл хаалларыы уонна сайыннарыы” бырагыраама улахан көмөлөөх.