Уопсай дьиэ кыра хоһугар 16 ыты ииппит дьахтары ыстарааптаатылар

Дьокуускай куорат Сэбиэскэй Аармыйа 50 сыла уулуссаҕа баар уопсай дьиэ кыра хоһугар биир дьахтар 16 ыты иитэн олорбут. Кини ыт оҕолорун уулуссаттан хомуйан  аҕалан хоһугар тутар эбит. 

Ол эрээри кэннилэриттэн хомуйбат, таһырдьа таһааран күүлэйдэппэт, киһилии көрбөт эбит. Тулуйа сатаан баран ыаллыы олорор дьон үҥсүү суруйбуттар. Онон ыттары мунньар дьахтары кыылы иитиигэ быраабыланы кэһии иһин административнай эппиэтинэскэ тардыбыттар. Бу туһунан СӨ Бэтэринээрийэҕэ департаменын пресс-сулууспата иһитиннэрдэ.

Департамент судаарыстыбаннай иниспиэктэрэ, Промышленнай уокурук исписэлиистэрэ, полиция участковайа буолан ыйыллыбыт аадырыска тиийэн балаһыанньаны билсибиттэр. 16 ыттан 12  ыт оҕотун ылан, ыты быстах кэмҥэ тутар «Помоги выжить» пууҥҥа илдьэн туттарбыттар.