ВЭФ-2024: Саха спортсменнара «Тихоокеанский рубеж» турнир кыайыылаахтарынан буоллулар

Мадьынылар Семен Ануфриев уонна Амаль Сафаров Владивостокка Илиҥҥи экэнэмиичэскэй пуорум чэрчитинэн «Тихоокеанский рубеж» норуоттар икки ардыларынааҕы турнир кыайыылаахтарынан буоллулар. Бу туһунан Спорт Якутии суруйар.

Владивостокка Илиҥҥи экэнэмиичэскэй пуорум успуорт бырагырааматынан «Саха сирин тимир суоллара» АХ бириистэригэр сахалыы национальнай элбэх көрүҥнээх күрэхтэһии ыытыллара үгэскэ кубулуйда. Кыттааччылар национальнай успуорт биэс көрүҥэр күрэхтэстилэр: 3х3 саха ыстаныылара, тутум эргиир, мас тардыһыы, кулун тардыы уонна бэрэмэдэйдээх сууруу.

Семен Ануфриев 80 киилэҕэ диэри атлеттар ортолоругар кыайыылаах тахсан, биэс көрүҥ күрэхтэһиигэ бастаата. Оттон 80-тан тахса киилэҕэ спортсменнар ортолоругар Москваттан мас тардыһыыга Арассыыйа успуордун маастара Амаль Сафаров бастаата. Иккис уонна үһүс миэстэ Монголия спортсменнарыгар тигистэ.