Жатайга айбардаабыт алабайы туттулар

Бүгүн, сэтинньи 14 күнүгэр, Жатайга айбардаабыт алабайы «Помоги выжить» пуун биригээдэтэ тутан пууҥҥа илпитин туһунан Екатерина Безрученко иһитиннэрдэ:

— Биһиги Жатай бөһүөлэгин кытта 200 тыһыынча солкуобайга дуогабардаахпыт. Ол эрээри ити дуогабарга бэйдиэ ыттары тутуу киирсибэт. Алабай ыт дьоҥҥо саба түһэ сыспытын иһин бэйэбит баҕа өттүбүтүнэн көмөлөһөр санаалаах тиийэн тутан аҕаллыбыт. Алабай боруодалаах ыт хаһан даҕаны бэйдиэ сылдьыбат, кини хаһаайыннаах буолар. Эппиэтинэһэ суох хаһаайыттар ыттарын быраҕан кэбиспиттэр. Ыттара иитиллибит сиригэр даача эҥээр тиийбитин буллубут. Аттаан, вакциналаан баран арааһа Москва, Питер эҥэр ыытарбыт буолуо. Биһиэхэ алабайдар уһаабаттар, улахан куоракка ыты иитээччилэр начаас ылан иһэллэр. Ыт көрдөххө сымнаҕас, холку курдук. Онон оннук айбардаан сылдьыбыта буолуо дии санаабаппын.