Алабай жатайдары куттуур…

Бэйдиэ сылдьар ыт кыһалҕата сыл ахсын кыстыкка киириигэ сүрүн кыһалҕа буолан хатыланар. Сайылык сезона бүттэ даҕаны Дьокуускай кытыы уулуссаларыгар үөрүнэн сылдьар ыт ахсаана элбиир. Билигин маннык уустук балаһыанньа улуустарга эмиэ баар. Оттон куорат таһынааҕы бөһүөлэктэртэн Жатайга бу кыһалҕа сытыытык турар.

Жатайдар приют тутарга тоҕо кыһамматтар?

Бу күннэргэ Жатай бөһүөлэгэр оҕолоох дьахтарга алабай түспүтүн туһунан иһитиннэрии кэлбитэ. Маннык ыт саба түһүүлээх быһылаан Жатайга былырыын эмиэ буолбута. Ыкка былдьаммат дьолугар, дьахтар элбэх кыбартыыралаах дьиэ подъеһыгар куотан быыһаммыт, тута олохтоох полиция салаатыгар сайабылыанньа суруйбут. Бу кэннэ СӨ Бэтэринээрийэҕэ департаменын иниспиэктэрдэрэ уонна Жатай бөһүөлэгин дьаһалтатын үлэһиттэрэ буолан, ыт саба түспүт сиригэр тиийбиттэрэ. Ол эрээри манна кинилэр көҥүл айбардыы сылдьар алабай ыты булбатахтара, тааһы бырахпыттыы сүппүт этэ. Хаһаайыттара айдаан тахсыбытыгар ыттарын хаайан кэбиспит буолуохтарын сөбө. Бу туһунан СӨ

Бэтэринээрийэҕэ департамена маннык эппиэти биэрдэ:

— Иниспиэктэрдэрбит Жатайдааҕы бэтэринээринэй пуунтан хас алабай боруодалаах ыт бөһүөлэккэ баар испииһэгин көрдөөбүттэрэ. Ити испииһэгинэн көрөн ыттаах хаһаайыттары кытта сэрэтэр үлэлэр ыытыллыахтара. Эппиэтинэһэ суох хаһаайыттар миэрэҕэ тардыллыахтара. Бэлиэтээн эттэххэ, бэйдиэ сылдьар ыттары көрүүгэ-истиигэ Жатай бөһүөлэгин дьаһалтата бэриллибит боломуочуйатын ситэ толорбот. Маны барытын бөһүөлэк дьаһалтата ыты тутар анал тэрилтэ, биригээдэ суоҕар сигэнэр. Атын улуустарга, бөһүөлэктэргэ ыты тутар пууннары, приюттары туталлар. Оттон Жатай бөһүөлэгин дьаһалтата ону тутуон оннугар Бэтэринээрийэ департаменын кытта сууттаһар. Жатай бөһүөлэгэ өрөспүүбүлүкэ бүддьүөтүттэн көрүллэр субвенцияны приют суоҕунан туһанар кыаҕа суох, ол түмүгэр бэйдиэ сылдьар ыт ахсаана кинилэргэ элбиир. Ыттары тутууга ханнык даҕаны үлэ ыытыллыбат.

Жатай бөһүөлэгин баһылыгын солбуйааччы эбээһинэһин толорооччу Руслан Кречетов:

— Сэтинньи 11 күнүгэр киэһэ 19 ч. 50 мүн. Жатай бөһүөлэгин полициятыгар оҕолоох дьахтарга алабай боруодалаах ыт түспүтүн туһунан иһитиннэрии киирбитэ. Биһиги тута “Помоги выжить” диэн ыты быстах кэмҥэ тутар пуун салайааччыта Екатерина Безрученкоҕа сибээскэ тахсыбыппыт. Биһиги бу пууну кытта бииргэ үлэлэһэр дуогабардаахпыт. Кинилэр биһиэхэ алабай ыты суһаллык тутарга биригээдэ ыыппыттара. Полиция үлэһиттэрин, ону сэргэ бэтэринээрийэ департаменын үлэһиттэрин кытта, борокуратуура дьаһалынан, административнай хамыыһыйа тэрийэн үлэлэһэ сылдьабыт. Дьахтар суруйбут сайабылыанньатынан күн ахсын ити алабайы тутаары эриэйдэ бөҕөтө оҥоһуллубута. Оҕолоох дьахтар хата ыттан эмсэҕэлээбэтэх, дьиэ подъеһыгар куотан быыһаммыт. Онон улаханнык куттаммыт эрэ диэххэ сөп. Уопсайынан, бэйдиэ сылдьар ыт кыһалҕата ханна барыай, баар. Сокуон хараҕынан ыттары тутабыт, аттаан, чииптээн баран төттөрү ыытыллар. Өскөтүн, бу чииптэммит ыт иккитэ хаста дьоҥҥо хабыр майгытын көрдөрдөҕүнэ биирдэ эрэ кинини туталлар уонна хаайаллар. Жатайга ыт дьоҥҥо саба түһүүлээх хас да түгэн бэлиэтэммитэ. Онно икки ыт хаһаайыннааҕа биллибитэ.

«Помоги выжить» пууҥҥа 1300 кэриҥэ ыт баар

Бэлиэтээн суруйдахха, Жатай бөһүөлэгэр эрэ буолбакка, Дьокуускайга, улуустарга бэйдиэ сылдьар ыт ахсаана олус элбэх. Ыт саба түһүүлээх айдаан сылга хаста да хатыланар. Cэтинньи 14 күнүгэр, «Помоги выжить» пуун биригээдэтэ Жатайга айбардаабыт алабайы тутан пууҥҥа илдьибитин туһунан Екатерина Безрученко иһитиннэрдэ:

— Билигин биһиги пууммутугар 1300 кэриҥэ ыт иитиллэн турар. Биллэн турар, бачча элбэх ыты аһатарга үп-харчы тиийбэт. Быһылаан туһунан этэр буоллахха, биһиги Жатай бөһүөлэгин кытта 200 тыһ. солк. дуогабардаахпыт. Ол эрээри, ити дуогабарга бэйдиэ ыттары тутуу киирсибэт. Алабай ыт дьоҥҥо саба түһэ сыспытын иһин бэйэбит баҕа өттүбүтүнэн көмөлөһөр санаалаах тиийэн тутан аҕаллыбыт. Алабай боруодалаах ыт хаһан даҕаны бэйдиэ сылдьыбат, кини хаһаайыннаах буолар. Эппиэтинэһэ суох хаһаайыттар ыттарын быраҕан кэбиспиттэр. Ыттара иитиллибит сиригэр даача эҥээр тиийбитин буллубут. Аттаан, вакциналаан баран, арааһа, Москва, Питер эҥээр ыытарбыт буолуо. Биһиэхэ алабайдар уһаабаттар, улахан куоракка ыты иитээччилэр тута ылан иһэллэр. Ыт көрдөххө, сымнаҕас, холку курдук. Онон оннук айбардаан сылдьыбыта буолуо дии санаабаппын.

Түмүк

Бэлиэтээн суруйдахха, алабай боруода биһиэхэ, Саха сиригэр, анамматах боруода. Хайа хотооллоругар бөрөлөртөн барааннары көмүскүүргэ анаммыт ыт буолар. Онон охсуһуук, бөрө хааннаах бөдөҥ ыттар күннээҕи олоххо анамматахтара биллэр суол. Ааспыт сыл күһүнүгэр «Үрдэл» пааркаҕа алабай боруода дьахтарга саба түһэн улаханнык эчэппитин туһунан суруйбуппут. Тутан «Помоги выжить» пууҥҥа илдьибиттэрэ. Онно туран ыт өлбүтүн туһунан сурах кэлбитэ. Хаһаайына кимэ ол курдук биллибэтэҕэ. Дьиҥэр, ыт иһин түгэҕэр клеймолаах диэн буолбута. Маннык боруода ыттар дьоҥҥо-сэргэҕэ олус сэрэхтээхтэр, кинилэр иитиилээх сааҕа тэҥнээхтэрин ыты иитээччилэр билиҥҥэ диэри үчүгэйдик өйдүү иликтэр. Биһиэхэ, Саха сиригэр, ыттан эмсэҕэлээһиннээх ынырык иэдээннэр буолуталаабыттара. Уон сыллааҕыта Тиксиигэ үөрдүспүт ыттартан аҕыстаах кыыс өлбүтэ, аҕыйах сыллааҕыта ипподромҥа ыттар дьахтары туппуттара. Ону таһынан, оҕолор, улахан да дьон эмсэҕэлээһиннээх иэдээннэр тахса тураллар да, ыттары олус кытаанахтык 498 №-дээх “Кыылга амарах уонна эппиэтинэстээх сыһыан туһунан” сокуон көмүскүүр.

Оттон оҕолорбутун, биһигини ким көмүскүүр? Сокуон сатаан уларытыллыбат буоллаҕына, ыты иитэр приюттар элбиэхтээхтэр, ыттаах хаһаайыттарга миэрэ кытаатыахтаах. Ыт чииптэммититтэн, аттаммытыттан майгыта тупсан кэлбэт. Ханнык да сымнаҕас ыт үөрдүстэҕинэ кыыла киирэр, томороон тымныылаах биһиги кыһыммытыгар кини эмиэ тыыннаах хаалар суолун көрдөөн, аччыктаан дьоҥҥо саба түһүөн сөп. Иитиилээх сааҕа тэҥнээх боруодалары иитиини бобуохха наада!