Абый улууһугар икки бөдөҥ ойуур баһаара бохсулунна

Абый улууһугар икки бөдөҥ ойуур баһаара Белай Гора уонна Киэҥ Күөл сэлиэнньэлэрин чугас умуруорулунна.

Бу туһунан ойууру баһаартан харыстыыр суһал ыстаап мунньаҕар иһитиннэрдилэр. Кэнники сууккаҕа Абый улууһугар уоту бохсуу үлэтэ салҕанан ыытыллыбыта, ол кэннэ авиациянан кэтээн көрүү түмүгэр икки ойуур баһаара тохтотуллубута бэлиэтэннэ. Уоту бохсууга араас улуустартан 150-тан тахса киһи кытынна, ол иһигэр 70-тан тахса идэлээх баһаарынайдар уонна уопуттаах быыһааччылар. Билигин кинилэр атын улууска ойуур баһаарын умуруорууга айанныахтара.

«Билигин уоту бохсуу бөлөҕө Үөһээ Дьааҥы уонна Орто Халыма улуустарыгар айанныырга бэлэмнэнэр. Бүгүн Дьокуускайга кэлбит суһал быыһыыр күүстэрэ уонна ЫБММ баһаарынайдара бөртөлүөтүнэн атын ойуур баһаарыгар көтөргө былаанныыллар», — диэн бэлиэтээтэ СӨ Гражданскай оборуона дьыалаларыгар уонна нэһилиэнньэ олоҕун куттала суох буолуутун хааччыйыыга миниистирэ Дмитрий Лепчиков. Билиҥҥи туругунан Саха сиригэр 99 ойуур баһаара уонна 1 ландшафтнай уот турбута биллэр. Алдан, Үөһээ Бүлүү, Үөһээ Дьааҥы, Бүлүү, Горнай, Кэбээйи, Ленскэй, Мииринэй, Ньурба, Өлүөхүмэ, Сунтаар, Таатта, Уус Маайа оройуоннарыгар ойуур баһаарын бохсоллор. Үөһээ Бүлүү улууһугар  нэһилиэнньэлээх пууннарга куттал суох буолуута хааччылынна диэн «Якутлесресурс» салайааччыта Виктор Омуков иһитиннэрдэ.

Билигин ордук элбэх ойуур баһаара Өлүөхүмэ улууһугар баара биллэр. Манна 500-тэн тахса киһи үлэлиир. Бу күннэргэ кэккэ нэһилиэнньэлээх пууннарынан тыал хайысхатынан буруо тарҕанара бэлиэтэнэр.