Байыастар доруобуйаларын чэбдигирдии үлэтэ салҕанар

Ю.П. Степанов аатынан Өрөспүүбүлүкэтээҕи социальнай-чэбдигирдэр, инбэлииттэри реабилитациялыыр кэлим кииҥҥэ 600-тэн тахса байыаннай дьайыы кыттыылаахтарыгар уонна кинилэр дьиэ кэргэттэригэр көмөнү оҥордулар. Бу туһунан киин дириэктэрэ Асида Алексеева брифиҥҥэ иһитиннэрдэ.

Чуолкайдаан эттэххэ, бу кииҥҥэ 331 байыас уонна кинилэр 279 чугас дьонноро доруобуйаларын чэбдигирдибиттэр. Бу үлэ Ил Дархан сорудаҕынан ыытыллар.

—— Кинилэргэ социальнай-психологическай, социальнай-мэдиссиинискэй көмө оҥоһулунна. Уйулҕалара, доруобуйалара чөлүгэр түһэригэр туһуламмыт кэлим үлэ ыытылынна. Холобур, «Самородок» бассейны кытта бииргэ үлэлэһэн, байыастарга гидрокинезотерапия дьарыгын ыыттыбыт, — диэн Асида Аллексеева кэпсээтэ.

Маны тэҥэ, байыаннай дьайыы кыттыылаахтарыгар уонна кинилэр дьиэ кэргэттэригэр иһитиннэрэр, сүбэ-ама биэрэр үлэ ыытыллар. Араас тэрилтэлэри кытта барыта 57 көрсүһүү тэриллибит.

Ил Дархан, бырабыыталыстыба пресс-сулууспата.