«Биһиги ССРС-тан төрүттээхпит»

Үлэ уонна социальнай сайдыы министиэристибэтин өйөбүлүнэн, Горнай улууһун уонна нэһилиэк дьаһалталарын эбии үбүлээһиннэринэн «Самородок» кэмиэрчэскэйэ суох тэрилтэ Өрт орто оскуолатын интэринээтин дьиэтигэр «Биһиги ССРС-тан төрүттээхпит» лааҕыр тэрийэн эрэр.

Манна аҕам саастаах дьон сылдьыахтара, лааҕырга араас маастар-кылаастар, үөрэхтэр, дьарыктар ыытыллыахтара диэн Горнай улууһун дьаһалтатын пресс-сулууспата иһитиннэрэр.

Ону таһынан нэһилиэккэ баар түмэллэргэ сырытыннарыы, устуоруйбатын билиһиннэрии үлэтэ ыытыллыа. Бу бырайыак Солоҕон нэһилиэгигэр үлэлиир түмэллэри сөргүтэр, кинилэр үлэлэригэр саҥа сүүрээни киллэрэр сыалтан тэрилиннэ.

Ол курдук, биллэр ырыаһыт Раиса Захарова олорбут дьиэтин сөргүтэн түмэл оҥоруу ыытыллар. Кини оҕолоро, аймахтара төрөөбүт, улааппыт дьиэтин сөргүтэн дьоҥҥо-сэргэҕэ көрдөрөөрү бэлэмнии сылдьаллар.